Cenazeya gerîlayê HPGyî Mahmût Alinbayî (Adnan Pîro) yo ke şerê 22-23ê Hezîrane de, Dêrsim de şehîd bibi, qezaya Pîranî ya Amedî de bi merasîmêkê ameye definkerdene.
Keye şi morgê Sazîya Tibê Edlîyî yê Meletî û cenazeya lajê xo girewte û bi rayîrê bejikî berde Pîran. Cenaze Pîran de bi hawayêkê qelebalix û bi eştişê siloganan ameye pêşwazîkerdene û merasîmê oxirkerdişî ame viraştene.
Parlamentera HDPyî, îdarekarê HDPyî û xeylî hemwelatijî beşdarê merasîmî bîyî. Kesê ke beşdarê cenaze bîyî, cenaze binê abluqaya polîsan de berde goristan û rixmê heme vernîgirewtişan de zî defin kerde. Ame vatene ke camîya qeza ya ke do şîn biameyêne kerdene bi fermanê Qeymeqamîya Qeza ameya padayene.
MA /AMED