Mi dersiminfo.com î de yew nuşte wend. Ez zaf tesîrê ci de menda. Nuşte 2 rojî mezgê mi ra nêvejîya. Nuşte Îlhamî Sertkayayî nuştbi. Verê mi yew romanê nê nuştoxî wendbi. Roman weşê mi şîbi. Tay kemaneyî hetê sererastkerdişî ra estbî. Tay cayan de dibareyî estbî. Sewbîna kitab hol bi. Wexto ke mi dêrsiminfo ra meqale wend ez şok bîya. Badê cû mi bire da ke ez yew meqale binusa û tay analîzan bikera ke wa mesele roşn bibo. Peyra mi keyepele ra ewna, nuşte amebi wedarnayîş. Baş o ke ame wedarnayîş. Nuşte de qij vînayîş, cor ra ewnayîş, xo zana û aqilmend dîyayîş est bi. Nuşte de rexnekerdiş ney heqaret kerdiş estbi ke naye zî kes qebul nêkeno. Ez bêrî mesele ser.
Rayber Abdullah Ocalan wexto ke dewe de cuyeno; vera gelek kerdenanê dewijan de vindeno. Cuye qebul nêkeno û keweno cigêrayîşan. Wexto ke dest bi wendişî keno, destpêk ra heta unîversîte, her çiqas serkewte yo zî cuya dewlete qebul nêkeno û cigêrayîşanê xo domneno. Serra 1973 de dest bi cuye û sîstemê xo keno. Dinyayêka cîya ronano û Partîye awan keno. A roje ra heta na roje her kesê ke beşdarê PKK bene, eslê xo de beşdarê zîhnîyet, îdeolojî û cuya Rayber Abdullah Ocalanî benê.
Ma de kes kadroyanê PKK, gerîla bo ne gerîla bo, Rayber Ocalanî ra cîya nêgenî dest. Ma heme hetan ra deyndarê Rayberîya xo yê. Partîye û kadroyanê ma de rastîyek esta; ma hereketê Rayberîye yê. Beno ke ê gelek kesan wina mebo la ê ma wina yo. Çiyêk raste de çin bî. Heme çîyo ke nika esto temamen saya Rayberîye de esto. Êyê ke naye nêzanê kewenê xeletîye. Tay kesî zî estê ke bi zanayîşî ya vera Rayberîye û PKK de vindenê û antî propaganda kenê. Êyê ke zanayîşî ya kenê ez înan fam kena. Dişmenê û dişmentîya xo kenê la êyê ke bêzanayîşî kenê rê vateyê mi estê. Ez vana lutfen Tevgerê Azadîye baş fam bikerê û tesîrê şerê taybetî yê dişmenî de memanê. Fina ez vana roşnvîr oyo ke kîşta şarê xo de vindeno û piştî dano têkoşînî. Xo teber de nêvîneno û seke yew kesêko xerîb bo bin nameyê rexneyan de dişmenîya Tevgerê Azadîye nêkeno. Eke keno û bi israr o, o wext guman zî virazîyeno û ganî merdim ci rê pers kero û vajo ti xizmetê kamcîn dişmenî kenê. Ez hêvî kena ke Îlhamî Sertkaya nînan ra yew nîyo.
Roşinvîrê erjaye ganî gerîla, Rayberîye û PKK ra cîya mevînê. Sankî gerîla zaf hol a la Rayberîye û PKK nebaş ê. Ez ferasetêko wina rê huyena. Her gerîla û şerwanê ke Rojawanê Kurdîstanî de şer kenê beşdarê PKK û HSD bîyê. Ruhê şer kerdişî Rayberîye ra gênê. Goreyê prensîbanê PKK ciwîyenê. Tay roşnvîrî heyfê xo şerwanan anê û wazenê aqil bidê ci ke çirê veng-veng şehîd kewenê. Xonêzanîye hende raver şîya merdim ecêb maneno.
Şorişê Rojawanî keda Rayber Abdullah Ocalanî ser ro raver kewt. Rayberîye serra 1979 ra heta 1999î Rojawanê Kurdîstanî de Surîye û Lubnanî de mend. Kedêka girde da. Tewr tay 30 hezar kadro perwerde kerdî. Dîplomasî raver berd. Wexto ke Şorişê Rojawanê Kurdîstanî dest pêkerd zemîn se ra se amade bi û Rayberîye no zemîn amade kerdibî. Yanî şoriş xaftila dest pênêkerd.
Ganî rind bêro dîyayîş ke her gerîla û şervan rêça Rayberîye de şinê. Hetê tuzelî de zî PKK ra bestaye yê. Şorişo ke beno zî şorişê Rayberîye û yê PKK yo. Lutfen wa roşnvîr û nuştoxê ma na rastîye ser o vinderê û bifikirê ke têkoşîn bihêz bikerê. Nêke do zirar bidê şorişî û şarê ma û şaranê Rojhelatê Mîyanênî.