Fermandarîyê QSD ser Hemleya Xelesnayîşê Reqa sûkeka Hezîme ke vakûrê Reqa de ya de kombîyayîşê çapemenî viraşt.Fermandaranê QSD, endamanê Meclîsa Sivîl ê Reqa, temsîlkaranê eşîrê Reqa ra pîya xeylê welatijî tewrê kombîyayîşê çapemenî bî. Xeylê rojnamegeranê medyaya neteweyî û mîyanneteweyî kombîyayîş ca de takîp kerd. 

Verfekê fermî yê QSD Talal Siloyî derheqê operasyonî de agahîyê hera day û vist vîrî ke xoverdayîkê demdergî ê quwetanê înan û yê pîyakar yê vera terorîstan, efsaneyê tarîxî û qehremanî amey afirnayen. Siloyî da zonayen ke xoverdayîşê tarîxî yê Kobanê ra heta xelesnayîşê Girê Spî, Hol û Şedadê, dewanê Dêra Zor û yê Reqa, xelesnayîşê awbendanê herême, xelesnayîşê bi des hezaran ronişteyanê nê herêman û bica ardişê hewcedarîyanê weşî yê înan, quwetanê înan xeylê hemleyê tarîxî biser vistî. 

 Quwetê ke tewrê hemle benê

Verfekê fermî yê QSD Talal Siloyî aşkere kerd ke ê ewro (vizêr) dest bi ‘Cengo Gird’ ê xelesnayîşê Reqa ke çeteyan xo rê kerdo zey paytexta teror û terorîstan, kenê û derheqê quwet û rêxistinê ke tewrê hemleya ‘Cengo Gird’ benê de zî nê agahîyan bare kerd. 

Goreyê agahîyanê Silo quwetê zey; YPG, YPJ, Artêşa Şoreşgeran (Ceyş El-Siwar), Cebhet El-Ekrad, Lîwa El-Şemal El-Dîmoqratî, Hêzê Eşîran, Tugaya Mexawîr Humis, Siqûr El-Reqa, Lîwa El-Tehrîr, Tugaya El-Selaciq, Hêzê Senadîd, Meclîsa Leşkerî yê Suryanî, Meclîsa Leşkerî yê Minbic, Meclîsa Leşkerî yê Dêra Zor, Hêzê Erka Xweparastin û Hêzê Nuxbe tewrê hemle benê. 

Talal Siloyî da zonayen ke no ceng bi paştîdayîşê gird yê Meclîsa Sivîl ê Reqa, Meclîsa Sûrîyeya Demokratîk (QSD), pîlê eşîran û rîspîyê herêmî û bi yardimê şarê herêmî virazîyeno. 

‘Quwetê ma amade yê’

Verfekê fermî yê QSD Talal Siloyî va ‘Ma mijdanîya destpêkerdişê Cengê Tarîxî’ yê xelesnayîşê Renga danê û wina va: “Quwetê ma bi  moralêke berz û amadekarîyê gird cengî ra amade yê ke plana lejkerî yê bi pîyakaranê ma yê Koalîsyonê Mîyanneteweyî bica bîyarê.”

Şehîdê qereçoxî bî meşale

Talal Siloyî aşkere kerd ke quwetê cîya zey mînaka hêrîşê ser Qereçox de ame vînayen, waştî vernîya na hemleya tarîxî bigîrê û manî bikerê. Siloyî vist vîrî ke nê hewldayenê beyhûde pêrokînî amey pûçvetiş û wina dewam kerd: “Nê hêrîşan eksê ci, îradeyê ma hona xûrtir kerd û israra ma ya têkoşîn ya hemverê terorîzmî hona vêşêr kerd. Şehîdê Qereçox ma rê bî meşale. Ma dê wayîrê vîrardenê înan bivejyê û serkewtişê ‘Cengê Gird’î dîyarîyê ruhê nê qehremanan bikerê.” 

‘Wa xo merkezê dişmenî ra dûrkerê’

Kombîyayîşê çapemenî de Siloyî herzewbîn veng da şaranê Reqa kerd ke dûrê merkezê dişmenî, noqteyanê hesas û cayê cengî bikewê, çormeyê quwetanê hemle de are bibê, yardimê ci bikerê. 

Verfekê fermî yê QSD Talal Siloyî veng da gencanê Reqa zî ke seba xelesnayîşê sûka xo tewrê quwetanê hemle bibê. Siloyî tewr peynî de şehîdê ke seba resnayîşê na merhale canê xo feda kerdî vîrard, dirbetinan rê şîfa waşt û qiseyanê xo bi nê vatenan qedêna: “ Ma bi nameyê Fermandarîyê Pêroyî yê Quwetanê Sûrîyeya Demokratîk (QSD), pêro quwet û komanê ke tewrê ‘Cengê Gird’î benê, bi cengawer û fermandarên ci, selamî kenê û înan rê serkewtiş wazenê. Eynî wextî de ma berxudarîya Quwetanê Koalîsyona Mîyandewletî zî kenê. Ma pêrokîn şaranê xo yê pêro mezheb û olan ke hemverê teroristan xover danê, selamî kenê. Herzewbîn ma pêro embazê rojnameger ke şerê ma raya pêroyî rê resnenê û seba dîmenanê ganî biancê leyê quwetanê ma bî, selamî kenê. 

Îzahatê QSD ra dima, şervanê QSD vizêr seat 16.00î de kişta rojhelatê sûk ra kewtî taxa Reqa.  


 ANHA/REQA