Heta nika 365 rojan miyan de tenya jû roj zey roja ceniyan amê qebûlkerdin. A roj zî bi bedelanê giran amê giroten. Serva ke 8’ê Adar zey roja ceniyanê gurekar qebûl bibo 129 ceniyan weşiya xo kerdî vinî. Zewbîn 364 rojan miyan de behsa heqanê ceniyan nîno kerdin û goniya ceniyan yena rijnayin. Ceniyê ke veriya hezaran serran raya zanabiyen hometî rê damisnay, peycoy hetê camêrdanê serdest erziyay teberê ciwyan.
Keşfê sifte yê ciwyanî hetê ceniyan bî. Tov-toximê ewil yê ekonomî, felsefe, zanabiyen û tip hetê ceniyan veriya hezaran serran amey eştin. Veriya nê panc hezar serranê serdest de wextê ceniyan bi. Ciwyayişa piyayî ya komunal estbî. Herkesî goreyê mentfaatê komuna xo hereket kerd. Kesî serva xo tenya teba nêkerd. Her çî serva pêrokîn hometî bi. ‘Wextanê ceniyan’ de ne herb, ne pere, ne artêş ne zî îxtidara ke hikimê hometî kena estbî. Bado ke ‘wextê camêrdê serdest’ destpa kerd mavêna hometan de ciyabiyîn destpa kerd. Peycoy înkarkerdişê ceniyan destpa kerd û panc hezar serriyo cenî zerreyê ciwyan de nînê hesibnayiş, heqê ci yenê binlingkerdin. Camêrdê serdest yê ke serva menfaatanê îxtidara xo her çî kenê pêrokîn dinya de herb danê ramiten. Bi milyonî însanî cayanê ciya de merhaleyê veyşanî de yê. Kiltûrê şîdet her ke şino beno gird. Xozaya ke ma miyan de ciwyenê xiravîn biya. Her ca ra gonî rijiyena, dinya endî nêşeno xo hewado û alarmê felaket çingneno. Camêrdî no dinyayî zey ê xo hesibnenê.
La endî cenî na şiyayişa talokeyîn ra vanê beso û heqanê xo yê rewa wazenê. Cenî vanê yê ke bingeyê ciwyan ronay, yê ke raya heqîqet damisnay ma yê. Cenî endî îxtidara qilerîn-leymin yê camêrdan rê vanê beso. Siyaseta şaş ya ke hêrs, zurrî, komplo, kiştiş teşwîq kenê rê vanê beso. Ekonomiya ke veyşanî, feqîrtî ferz kena rê vanê nê, hurendiya nayî de ekonomiya komunal ferz kenê. Cenî endî camêrdo ke xo zey zanyar û cenî zî zey nêzan vîneno red kenê. Cenî endî camêrdê serdest ra vanê vinderê û verniya ci de vindenê.
Riwalê ke cenî sîstema serdest yê camêrd red kenê cok ra raştê şîdet, tecawiz û kiştiş yenê. Çi ke camêrdo serdest nêwazeno ke sîstema ci biwelişyo û çi qe destê ci yeno na sîstema xo ya wilerîn paweno. La endî camêrdo serdest se bikero wa bikero nêşeno na sîstema qilerîn ser payan de vinderno û do welişnayiş ra nê reyno. Çi ke endî çimê ceniyan, zanabiyişê ceniyan abiya. Endî kes nêşeno verniya ceniyan bigîro. Cenî reyna ciwyana azad û demokratîk ke veriya des hezar serran toximê ci eştbî ronenê. Dinya do reyna açarniyo rengê ceniyan, rengê haştî û serbestî. Pêşengeya na tekoşînî zî ceniyê Kurd kenê. Hezarî ceniyanê Kurd serva ronayişê sîstema serbest ganê xo feda kerd. Xo kerd bombe û mezgê sîstema serdest yê camêrdan de teqînay. Xo kerdî adir veşnay.
Endî ‘wextê ceniyan’ ame. Endî tenya jû roj nê, pêrokîn rojî yê ceniyan û civakî yê. Endî jû roja camêrdanê serdest do nêmano. Camêrdê ke wazenê ceniyan ra piya azad biciwyê sifte gerek ceniyan rê, qeçikan rê, xoza rê hirmet bigîrê. Camêrdê ke heqanê pêrokîn ganiyan rê hirmet nêgînê rê endî ca çinyo. Çi ke endî cenî yenê pêser, xo rêxistinkenê û qûwetê xo kenê jû. Wa camêrdê ke ceniyan înkar kenê înan ra bitersê. Endî camêrdê ke ceniyan rê şîdet şixûlnenê ya kî înan wetilkenê ba bitersê. Beno ke hiqûqê dewletan înan pawenê la cenî dê cezayê înan bidê. Bi omidê pêrokîn wextî bibê yê ceniyan 8'ê Adare ceniyanê Kurd û pêrokîn ceniyanê azadîwaşt rê bimbarek bo.