Li gundên sêgoşeya Heleb, Cerablûs û Ezaz ên komên çete ku bi pêşengiya hin komên noker ên Kurd êrîşî gelê Kurd kirin, niha jî zext tê kirin ku li van gundan komên çekdar werin avakirin. Serokê Meclisa Gel a Herêmê Recep Xelfan der barê mijarê de agahî da û diyar kir ku ji ber tirsa girtin, biçekkirina bi zorê û komkujiyê, nêzî 10 hezar mirovan koç kirine, bi sedan kes hatine girtin û ew ji jiyana mirovên hatine girtin bi fikar in.
Serokê Meclisa Gel a Herêma navbera Cerablûs, Heleb û Ezaz ku ji 117 gundan pêk tê Recep Xelfan, der barê êrîşên çeteyan ên bi komkujiyên li Til Eran û Til Hasilê destpê kirin û hîna jî dewam dikin, agahiyên girîng da. Xelfan diyar kir ku bi êrîşên komkujî û koçberkirinê zêdeyî 10 hezar mirov ku koçber kirin, tê xwestin ku herêm bê Kurd bê hiştin û wiha axivî: “Êdî li herêmê mîna cerdevaniya li Tirkiyeyê, biçekkirina gundan bi zorê tê ferzkirin.

Xelfan da zanîn ku tu gund nemane rastî êrîşan nehatine û wiha got: “Di demên dawî de diavêjin ser gundan û hewl didin bi zorê çekan bidin gundiyan. Bi alikariya Kurdên nûker ku her daîm xwe difirûşin komên çete êrîşî gel dike. Ji ber komkujiya li Til Eran û Til Hasilê, Şoreşger Eniya El Ekrad, qaşo ji bo gel hîn bêtir zerarê nebîne, bi awayekî taktîkî xwe vekişand. Çeteyan jî ev yek weke firsend bikar anîn û êrîşên xwe zêde kir. 


SEYÎD EVRAN-ANF/EFRÎN