SEYÎT EVRAN / MA/KERKÛK
Artêşa Iraqî û Heşdî Şabî 16ê teşrîna verêne de referandumî kerdbî mehne, hêrişê Başûrê Kurdistanî kerdbî. Netîceyê hêrişan de Celavla, Mendelî, Xaneqîn, Xurmatû, Dakuk, Kerkûk û dormeyê ci, Mexmur, Şengal, Rabîa, Zumar, Pirdê û xeylê dewe girewtbî kontrolê xo.
Çeteyê Cepheyê Tirkmenanê Iraqî (ITC) zî nêyî sey firsend dîyî û hêrişê kurdan kenî. Nê hêrişan ver bi hezaran kurdî koç kerdî. Çeteyê ITCyî heta nika bi seyan keye û cayê karî veşnayî.
Bitaybetî Xurmatû de hêrişê xeylê giranî bîyî û netîce de bilanço giran o. Hêrişan ra ver nufûsê Xurmatû 190 hezar bî, labelê hêrişan ver nizdîyê 80 hezar kurdî koç kerdî. Heta nika 59 cayî ameyî veşnayîş, 1700 keyeyî û 357 dikanî ameyî talankerdiş, reyna 8 cayê karî yan zî fabrîkayî ameyî veşnayîş. Nê hêrişan de 11 kurdî merdî û 200î ra zêdeyêr kurdî zî birîndar bîyî.
Yew rojnameger zî ame kiştiş
Qezayanê Kerkûkî ra Dakuk zî raştê hêrişanê girdan ame. Dakuk de heta nika 23 keyeyî ameyî veşnayîş, yew salona veyveyî û îstasyonê petrolî ameyî teqnayîş. Hêrişan de yew rojnameger zî ame kiştiş. Hêrişan de çîyo ke bala merdimî anceno, heta nika vera nê hêrişan de ti kes nêvindeto.
Heto bîn ra yeno vatiş ke Taze, Beşîr, Celavla û sewbîna cayan de zî keyeyî ameyî veşnayîş, labelê nê cayan ra xeberê zelalî nînî girewtiş.