Cenazeyê Rusul Çetîn ê ku di 11’î Îlonê de li navçeya Şemzînanê di encama gulebarana leşker û polîsan de hate birîndarkirin û li Nexweşxaneya Yuzuncuyilê jiyana xwe ji dest da li gundê Şapatanê ji aliyê hezaran kesan ve hate definkirin. Bi hezaran kesên ku bi konvoyeke ji navçeya Geverê hatin di ketina Şemzînanê de ji wesayîtan daketin û 5 kîlometre meşiyan û çûn gundê Şapatanê. Cenazeyê Çetîn li gund li cem Osman Erbaş, Nejat û Teyyar Gurelî hate definkirin. Di merasîma cenaze de „Tolhildan“ û „Kujer Erdogan“ hatin berzkirin û wêneyên kesên ku hatin qetilkirin hatin rakirin. Nûnerê MEYA-DER’ê Ramazan Sever axivî û got ku ewê hesabê zilma AKP’ê bipirsin. Sever da zanîn ku gelê Kurd dê li dijî zilmê li ber xwe bide.

‘Hikûmet dijminatiya Kurdan dike’
Hamît Geylanî jî, axivî û got her kuştin dilê gel dişewtine û berdewamkir „Her kuştin dilê me dişewitine, lê her canê ji me diçe serhildana Kurda zêde dike. Li Şemzînanê 4 roj berê di nav du aliyan de pevçûn derket. Di pevçûnê de 4 sivîlan jiyana xwe ji dest da. Lê Serokwezîr Wezîran ji bo van kuştinan tu gotin ne gotin. Wezîr hatin navçeyê û bi polîs û cendirmeyan re hevdîtin pêk anîn. Lê sivîlên hatin kuştin nedîtin û malbatên wan ziyaret nekirin. Ev jî dide xuyandin hikûmeta AKP’ê li dijî gelê Kurd dijminatiyê dike.“ Geylanî, bal kişand ser rewşa Rêberê PKK’ê Abdullah Ocalan û wiha axivî: „Ev 50 rojin Birêz Ocalan bi parêzer û malbata xwe re nikarê hevdîtin pêk bîni. Sedema ve biryara şer giritineyê. Dizanin ku Birêz Ocalan dê lîstîka wan xira bikê û kuştinan bide sekinandin. Ji ber vê jî destura hevdîtinê nadin. Lê Kurd de serhildanên xwe dewam bikin.“

Piştî axaftinan ji bo kesên tevli merasîma cenaze bûn xwarin hate dayîn.

COLEMÊRG