Awankarê Artêşa Rizgarîya Şarê Tirkîya (THKO) Denîz Gezmîş, Huseyîn Înan û Yusuf Aslan ke eynî wextî de awankarê têkoşînê şorişger yê Tirkîya yî, Serrgêra 45. ya Îdambîyayîşê xo de Warê Pawitişê Medya de ameyî yadkerdiş. 

Merasîmê yadkerdişî de Endama Komîteya Merkezî ya PKKyî Dilzar Dîloke muhîmîya na roje ser o qisey kerde.

Endama Komîteya Merkezî ya PKKyî Dîloke dîyar kerde ke cewabo ke seba têkoşînê Denîz Gezmîşan bêro dayîş, wayîrvejîyayîşê têkoşînê înan o û wina va: “Denîzan Koyanê Nurhaqî de dest bi têkoşînî kerd û no zî seba têkoşînê gerîlayan fermanêk o. Linga nê meşîyayîşî yê Kurdistanî, bi meşîyayîşê azadî yê PKKyî ame domnayîş û heta roja ma ya ewroyêne ameyo.”

Zîhnîyetê Neteweya Demokratîke

Dîloke va ‘Denîz Gezmîş û embazanê ey tena seba şarê Tirkîya dest bi têkoşînî nêkerdî’ û wina domnaye: “Hem wayîrê helwestêko neteweyî bîy û hem zî wayîrê helwestêko enternasyonal bîy. Her çiqas ke o wext ma sey enternasyonalîzmî şinase kerdêne zî, dûşto ke dayêne cuyayîş, merdim eşkeno sey zîhnîyetê neteweya demokratîke şinase bikero. Sebebo tewr gird yê kişîyayîşê înan zî no bî. Her çiqas ke nê şorişgeran zaf rew merdî zî emrê xo ra pîlêr têkoşînêk pey xo de verdayî. Wexto ke merdim na çarçewa ra biewnîyo, ya muhîm derg cuyayîş nîyo; ya muhîm a ya ke merdim bişînbo her vîsta ke tede cuyeno, manîdar bikero. Tayê merdimî estî, cuya xo de tim qehremanî kenî. Tayê merdimî estî bi vatişêkê xo cuya xeylê merdiman de rayîrê qehremanîye akenî û rayîrê înan roşne kenî. Embaz Hakki wina bî. Îbrahîm Kaypakkaya, Mahîr Çayan û Denîz Gezmîş wina yî û mîraso tewr gird ke ma rê verdayî, hemleya tevgerê azadî PKK yo.”

Dewamê komplo yo

Dîloke bale ante 6ê Gulane roja îdambîyayîşê Denîz Gezmîşan ser û wina va: “6ê Gulane de eynî wextî de vera Rayberê Şarê Kurdî Abdullah Ocalanî de zî komployêk ame kerdiş û bi no hawa do komplogeran bivatêne; ti Mamak de destê ma ra xelisîyayî, tu remayî Sûrîye, labelê ma tîya de zî hewl danî to çinî bikerî. Hedefê înan no bî, labelê nêşînayî bikerî. Vîrê dagîrkeran zî esto û dagîrkerî wazenî nê rojan de vîra komelî de koletî û qirkerdişî kûr bikerî.”

Dîloke qiseykerdişê xo de qala awanbîyayîşê Tevgerê Şorişê Yewbîyaye yê Şaran (HBDH) û Tevgerê Şorişê Yewbîyaye yê Cinîyan (HBDC) kerde û wina va: “Her di rêxistinî par 12ê adare de ameyî awankerdiş. No seba têkoşînê Kurdistan û Tirkîya zaf muhîm o. Nê tevgerê ke xeylê rêxistinê sosyalîst û şorişgerî tede ca gênî, seba awankerdişê neteweya demokratîke zaf muhîm î û eşkenî vernîya averşîyayîşanê muhîman biakerî.

Wa wayîr bİvejyî

Dîloke va ‘şoriş heme ca de yo; şoriş koyan de yo, bajaran de yo û her vîsta ke ma tede yî de yo’ û wina qedênaye: “Her cayo ke ma xo zîhnîyeto hakim ra biqerfnî, fikro azad xelq bikerî û cuya azade awan bikerî de yo. Heme şorişgerê Tirkîya, bi taybetî zî cinîyî eşkenî nêyî bikerî. Bi nê wesîleyî cewabo tewr gird yê seba şehadetê 6ê Gulane, wayîrvejîyayîşê têkoşînê Denîz Gezmîş, Şehîd Sarya û Nûcanan o. Rayîrê ci girdkerdişê têkoşînî yo. Ma veng danî heme ciwanan ke wa beşdarê HBDH û HBDCyî bibî û bi rijnayîşê îqtîdarê AKPyî serbikewî.” 


ANF /BEHDÎNAN