Dersimijî kî bi rojan o verra sereştişanê dewlet meydanan der ê. Roja verî kî bi seyan kesî onca serê çarşiye binê hard de ameyî têhet û bi jû fekî ra sloganê ‘xoverdayiş’ kerdî berz. Emegdaranê emegî û welatijan nûmayisa roniştenî viraştî û mesaja xoverdayisî day. Demê nûmayisî de azaya Koma Haştî yê Diyîn Aysel Dogan qeseykerd û ard vist vîrî ke iyê ke erzene xover iyê dê serbikuyê.
Mektevê dewlete cayê asîmîlasyonî yê
Dogan hayr ant sereştişanê faşîz yê hikûmeta AKP ser û va: “Derbeya ke dewleta înkarkerdoxe virajena bi karî ra estisê qûwetanê demokratîk wazena temam bikero. Azayanê Egîtîm Sen û KESKî na rîwal ra hedef cerîye.” Aysel Dogan hayr ant zihnîyet û sîstemê perwerdeyê antîdemokratîk yê Komara Tirkîye ser û nîya va: “Ronayişê komare ra na het mektevê dewlete bî cayê asîmîlasyon û înkarî. Riyê dewleta kolonyalîst bi rêxistin bîyayena vejîya werte.” Dogan ard zon ke emrê îşgalê înan hata virnîya ala ke darde kerda wa û va ‘serva weşîya demokratîk û serbest proje û alternatîfê ma kî este.’
Dogan hayr ant perwerdeyê zonê mayî ser û aşkere kerd ke ê pêro taxan û çêyeyan (keye) çarnenê mektevî. Peynîya qiseyanê xo de Dogan îşaretê weşîya xoser kerd û va ‘Bi perwerdeya demokratîk, serbestî û têdûst weşî û hometa newî înşa keme.’ Sûk de 418 mûalîmî, 504 emegdarê perwerdeyî karî ra erzîyay dûrî.
DÎHA/DERSIM