Ceylan Onkol Amed-Licê de hetê quwetanê dewlet ra qetil bî. Vizêr serragêrê kiştişê Ceylan bi. Qetilkerdişî ser ra 7 serrî viyertî ra, la qetilkarî hama nêamey cezakerdiş.
Lejê hukumetê AKP ê Kurdistan ra tewr zaf zî qijî (domanî) zirar vînenî. Nê qijan ra yew zî kênayê şûnî Ceylan Onkol a. Ceylan wexto ke hama 12 serrî bî, 28 de Îlon ê 2009 de wexto ke pês xo çirnay (çernay) qezaya Amed Licê de hetê lejkeranê qeraqolê Yayla ra qetil bî. Keyeyê Ceylan meyîtê kênayê xo cayê biyayîş de letêkerde dî. Ceylan hetê tabûrê Cendirmeyan ra qetil biya. Goreyê raporî sebebê teqîn muhîmatê bomba bi.
Dawa de jû gam avey nêşîya
Ser qetilkerdişê Ceylan Onkol ra 7 serrî viyertî ra. La no waxte de dawayê Ceylan yew gûm zî ver nêşî. Qetilkaranê Ceylan herinde ceza de xela guret. Cipersayişê Ceylan edliye ê Licê de helisyayişî rê terk bî. Komîsyonê Hiqûq ê Şûbeyê Komela Heqê Merdiman û Pawitoxê keyeyê Onkol Rahşan Bataray vist vîrê ke dosyayê ke quwetê dewlet şikinî ci rê tewsîrin û bêhet yew cipersayîş nêbeno û dawayê Onkol zî înan ra yewa. Bataray arde zûne ke Tirkîye de sûcê ke quwetê dewlet ci ra mesul ê, taybetî zî Kurdistan de, nê qetilkarî pawiyene. Keyeyê Ceylan Onkol semedê caardişê edaletî serpirodayişê Mehkemeya Heqanê Merdiman ê Ewrûpa. La ûca ra zî semedê verşiyayîşê dawayî yew tul nêerziyay. Bi sebebo ke xelyek waxt viyert ra û hama qetilkarî nêveciyay binatanê, keyeyê Onkol reyna serpirodayişê Mehkemeya Heqanê Merdiman ê Ewrûpa kerd û hay cewab pawene.
Mezelê domonan
Dewleta tirk serra 1988’î ra na het qeçikanê (doman) kurd xo rê kena hedef. Dewlet mavêna serranê 1988-2013 de 569 domanî qetil kerd. 3 serranê peynî de zî bi desan domanî kişîyay. Polîs û cendirmeyê ke qanûnanê dewlet ra qûwet gênê jû bi jû domonanê kurd kişenê. Zerreyê nê qeçikan de taynê ci hewna nêkewtibî 2 serrîya xo. Taynê ci hona çend aşmî, taynê ci 1 serrî, 3 serrî, taynê ci 7, taynê ci des serrî bî hona. Pitika Mîray wexto ke Cizîr de amê qetilkerdiş hona 3 aşmî bî. Cemîla, Baran Çagli, Dûran Abdullah Kaya, Ûgûr Kaymaz, Berîvan Kara, Mehmet Ûytûn, Solîn, Berkîn Elvan seyan domonan ra tenya çendê ci yê. Nihat Kazanhan o ke 14ê Çile 2015î de Cizîr de ame kişten hona 12 serre bi
Çima domanê kurd hedef de yê?
Çi ke domon û gencî ameyinê qomî yê. Damarê dînamîk yê tarix û nikayî yê. Faşîzm û dîktatorî qebûl nêkenê. Jenerasyono ke pêrokîn erjayeyanê kulturî û vîrî biresnê jenerasyonanê newî yê. Dewlet nê qeçikan ra tersena, cok ra xo rê kena hedef û kişena. Tirkîye de qîmetê ciwyanê kesî çinyo, cok ra cezayê kiştişî zî çinyo. Dewleta kiştoxê qeçikan cayo ke kiştoxan ceza bikero, bi tazmînatan, bi pereyan wazena hêrs û janê malbatan bihereyno.
Hurendîya domanan de tezmînat
Dawaya Ceylan Onkol de zî dewlet waşt bi tazmînatê 28 hezarî veng û hêrsê malbata Onkol bibirno û serê sûcê xo bigîro. La malbata Onkol cewabê ‘Ciwîyayişê Ceylan nîno rotiş’ û waştena cezakerdişê kiştoxan kerdibî. Serva domonê ke Roboskî de amey qetilkerdin de zî dewlet waşt bi çend hezar pereyan na dawa bigîro. La bi belgeyan werte de yo ke na dewlet no 40 serrîyo hezarî Kurdî qetil kerd. Serva dewlet camêrd, cenî, genc, kal-pîr, qeçik ferq nêkeno. Dewrê AKP de zî nê kiştişî dewam kerdî. Reîs-cûmhûrê no welatî polîsê qetilkar bimbarek keno, xelat dano înan. Cok ra peyniya kiştişan nîno. Sermiyanê dewleta tirk bi serrano Tirkîye açarnay zey mezeleyê domanan.
NAVENDÊ XEBERAN