CHP alternatîfê AKP nêbena, çike yê hurdemîne bingê xo jû yo. Ferqê hurdemîne çîno. Alternatîf ke vajiya, gune raye û siyasetê xo zovîna bê. AKP vana, “tek Milet, tek welat, tek desmale” CHP zî hen vana. Hatta nî vatîşî AKP, CHP ra guretê. Bingê dewleta tirkî CHP est û hata na roze zî hen mendo. CHP seweta bindestan, emegdaran û kemiyan alternatîf nêbena. AKP hora ver ra na het partiya sîsteme biye.

Bî taybetiye rozanê peyenan de vejiya werte ke, AKP alevî rê, mordemê bindestî û kemiyan rê dismen a. Sîstema ke nika Tirkiya de hukum ramena, hetê CHP ra amê ronayene. AKP ser nêwazen jede çiye vajî, çike xora zaf dûrî vînen.
Tarîxê CHP tarîxê qetlîaman o. Belka xo dibare ken, hama gune reyna vajîne: Binê rayveriya Ataturk û CHP de Qoçgîrî, Amed (Hereketê Şex Saîd) Zîlan û Dersîm de qetlîamî ameyî virastene. CHP û tornanê Ataturk hata ewro rîwalê nî kerdîsanê xora leborîne newaste. Na semed ra CHP seweta însanê bindestî sitare nêbena.
Mordemîke tarîxê CHP de niyada, vîneno ke CHP bi gonî xo kerdo weyîye. Demê serdestiya xo yê 27 serran de CHP gonî risnê, terteleyî kerdî. Yanî CHP 1923 ra hata 1950 Tirkiya bi gonî îdare kerde. 27 serrî CHP dîktatoriya xo eskera dê ramitene.
Demê Ataturk de qetlîamê aleviyan bî. Qoçgîrî û Dersîm de alevî ameyî qirkerdene. Diyanet Îşlerî 1924 de hetê hukumatê Ataturk ra ame ronayene. Bi ronayena na saziye aleviyan darbede girse gurete.
Naye ra dime, 1925 de Ataturk bi vetena qanunê tarîqatan, na raye zî dewreşiye kerde qedexe. Eke ewro Tirkiye de sazî û dezgê aleviyan resmiyet de çînê, no hunerê CHP yê Ataturk yo. CHP na binge sero ama înşa kerdene.
30 asma adare Tirkiya de weçînîtîsê mahallî estê. Niyadan taye saziye ma yê alevî vengê xo berz nêkenê û CHP ra hesab pers nêkenê.
Çike, seke vat en jede alevî hetê CHP ra amê qirkerdene. Tirkiya de na dem de seweta her kesî, verva AKP, teyna jû alternatîf esto.
No zî BDP/HDP ya. Alevî besekenê naca meramê xo biyarê zon. Zerrê HDP de babet babet siyasetî, kemî û îtîqatî estê. Alevî zî besekenê HDP de wayîrê veng bê. Alevîke wazenê zulm ra bixeleşiye, zulmê AKP ra bixeleşiyê, zulmê dewleta tirkî ra bixeleşiye, gune CHP ra zî dûrî vindê. Çike sîstemake alevî qirkerdê, dewletake dezgê aleviyan kerdê qedexe û Diyanet Îşlerî sarê aleviyan rê kerdo bela, CHP nayî ro.