Krîzê ekonomî koçeranê ke dormeyê Qerejdaxî ya qezaya Sêwregi ya Riha de cuyenî ser o zî tesîr kerda. Koçerê sêwregijî ke serre de 12 aşmî zozanan de gêrenî û heywanan miqate kenî, zêdebîyayîşê vaya simêr û cewî ra gerrekar î. Reyna koçerê hetê dîyayîşê awe û merge de zehmetîyan ancenî.
Koçeran ra Omer Gurkan o ke heywanê xo berdî bazar û nêşêna biroşo, vano ‘ez 52 serrî yo ke heywankarîye kena’ û wina domneno: “3 serranê peyênan de bi zorî bo zî ma tayê qezenç kerd. Labelê emser bi temamî no kar merd. Ca û warê ma çin o. Nika ma hamnanî de yî, labelê awe çin a.”
Gurkan vano ‘ma kîloyê penîrî 5 TL ra roşenî’ û wina dewam keno: “Çi mast û çi zî heywan bi xo pere keno. No mewsîm ra dima ganî ma seba heywananê xo rê cayan bivînî. Cayê ke ma şonî de ma ra seba mergeyan 30-40 hezar TL pere yeno waştene. Ma serre de 12 aşmî çadiran de cuyenî. Verê cû ma wexto ke heywanê xo berdêne bazar, ameyêne rotene. Labelê nika nîno rotene zî.”
Heme çî vay bîyo, labelê heywan ercan o
Koçeran ra Fahrî Gerçek o ke 30 serrî yo koçerî keno, wina vano: “Ma nêşênî awe peyda bikerî. Vaya simer û cewî zî zêde bîyo. Êdî nêerjîyeno ke merdim heywanan biroşo. Çimkî mesrefê ci nêvejîyeno. Ma seba ke tîya de golêk bêra viraştene, muracat kerd, labelê cewab nêdîya.” Şefîk Koyuncu zî dano zanayene ke simêr û cew vay î, labelê heywanî ercan î û ma nêzanî ke se bikerî.
Enver Gurkan zî vano ‘cereyan û awe çin a’ û wina dewam keno: “Ma nê şert û mercan de nêşenî heywananê xo biçerênî.”
MA/RIHA