Dadesê rojî başurê Kurdîstanî de mendune. 8ê nîsane ra hata 21ê nîsane. Hem sukan de hem kî di-hîre rojî koyanê Kurdîstanî de fetelîne. Tabî tewir tewir hêkatî gosdayî, xêle çî dî. Pêrodayîsê Kurdan yê 40 serranê peyenan de çi amo ciwiyayene, mordem besenêkeno wertê 10 rozan de tam bivîno û fambikero.

La, taye hêkatî estê, mordem sas beno û nêşîkîno qeyta xo vîra bikero. Di hêkatan zaf alaqa mi onte. Nînan ra jûye kî hêkata Şehîd Cîger ya. Hêkata jû xortê kurdî. Koyanê Kurdîstanî de seweta serbestiya ma dopêro. Koyan de însanî çitur danê pêro, quwet û qudret kotî û kamî ra cenê, bi sene îtîqat koyan ra manenê û danê pêro, aqilê mordemî ser nêsono. Qeyta jû qeleme besenêkena na dez, na dram û na rindekiye tam biyaro zon. Rindekiye, çike ma ewro sayiya nî xort û azebanê çeran de sereberz fetelîme û eştîme.
Şehîd Cîger herema Haftanîn de bi gerîllayan ra piya Kurdîstanî de sevda xo yê serbestiye û kamiye cereno. Na sevda, sevda henen a ke tehlîke û merdîs nasnêkena. Sevda Şehîd Cîger verva dêvê hewt sareyîn kuna qewxa, ters nêzonena.
Rozê, Şehîd Cîger herema Haftanîn de payna mayînî dano û jû qorê xo keno vîndî. La, Cîgerê ma teslîmê ciwiyayîsê nêweşî nêbeno. Cîger aynî hereme de bêmavên sevda xo keno saye, dano pêro. Cîger bi jû qorê xo koyan ra jê xezale na kemere yê mi, a kemere yê to, serbestiya xo, serbestiya ma cereno. Hora hevalê Cîger kî namê ey “Xezala jû Qorine” nanê pa, yanî “tek Bacakli Ceylan.
Bimiro taliyo şa! Tam 6 serrî biyayîsê virenî ra tepiya onca aynî hereme de bi linga xo ya bîne payna mayînî dano û beno şehîd, Cîgerê ma. Niya ra hêkata Cîgerê ma! Kamke Cîgerê ma jê şehîdê Kurdîstanî qebul nêkeno, sola ocaxa ey kor bo!
Hêkata bînake ez guretu binê tesîrê xo, çalakiyê Viyan Soran bî. Vîyan Soran 2006 onca herema Haftanîn de verva komployê miyan netevî lesa xo sanê adirî ver û şehîd kewte. Waxtoke Viyan lesa xo sanena adirî ver, ebi a adir kile 10 metre davacer sona. Cer virare fîna jû dare ra hatake şehîd bena. Çi xezev! Kila henen a ke dara tern û teziye kî tey vêsena.
Nika a dare onca biya kewiye û ciwiyena. La bi jû dirvetî. Mordem dirvetya a dare vîneno, tolê xo hona tam pêser nêamo. Kam çi zono, belka kî Viyan virare fîşta dare ra û vato: Mi ef bike ez wazen tora kelê xo bibirnî, la belka dezena, mi ef bike dara tern û teziye!’
Îşte nî xort û azebê royê pakî seweta serbestiya ma koyanê Kurdîstanî ra niya danê pêro, niya şehîd benê.