Çim û goşê bi mîlyonan Îmrali de yî

ERDOGAN ALAYUMAT / MA/RIHA

Rayberê Şarê Kurdî Abdullah Ocalan 27ê Temmuza 2011î ra nata avûkatanê xo reyde, 11ê Êlula 2016î ra nata zî nêşêno keyeyê xo reyde pêvînayîş bikero. Keyeyê Ocalanî bale ant tecrîdo girankerde ser û seba ke şert û mercê Ocalanî bêrî raşt kerdene, veng da.

Keyeyê Ocalanî ra Mehmet Ocalanî dîyar kerd ke roja Ocalan ardî Tirkîya ra nata binê tecrîdî de yo û wina va: “Tayê donemî tecrîd ame nerm kerdene, tayê doneman de zî ame giran kerdene. Labelê 19 serrî tecrîd qet nêame wedarnayene. Tecrîd serra 2015î ra dima tecrîd hîna zaf ame giran kerdene. No proses de ma tena reyêk pêvînayîş viraşto. Heme muracatê ma ameyî red kerdene. Ez veng dana raya mîyanneteweyî ke wa kanalê pêvînayîşî bêrî akerdene. Beno ke şima bi hawayo sîyasî şima Ocalanî ra hes nêkerî, labelê şima nêşênî keso ke îradeya bi mîlyonan o, tecrîd bikerî. Ewro çim û goşê bi mîlyonan Îmrali de yî. Ganî seba pêvînayîşê keyeyî destûr bêro dayene. Eke tecrîd bêro şiknayene, o wext Tirkîya de aştîye beno.”

Ganî berê Îmrali bêrî akerdene

Waya Ocalanî Fatma Ocalanî zî daye zanayîş ke ê cuya Ocalanî ra etirîyenî û va ‘seba ke etirîyayîşê înan biwedarîyo, ganî berê Îmrali bêrî akerdene’.

Warezayê Alî Ocalanî zî va ‘tecrîdo ke Rayberê Şarê Kurdî ser o yeno domnayene, şerî hîna kûr keno’ û wina dewam kerd: “No nizdîbîyayîş xizmetê aştîye nêkeno. Eke kanalê pêvînayîşî akerde bibîyêne, ewro krîzêko winasî nêbîyêne. Ocalan şênayêne zaf çîyan bikero. Goreyê mi Ocalan mîyanê şaranê kurd û tirkan de sey pirdêkî yo. Ganî dewlete nêyî bivîno. Ganî şertê Îmrali bêrî raşt kerdene û kanalê pêvînayîşî reyna bêrî akerdene.”