Cerdewanê parekî çimeyanê awe ra wazenî, destpêkê de gef dewijan wendî, peynî zî gule veraday ser dewijan. Nika zî nêveradanî ke dewijî heywanê xo biçêrînî zozanê ke her dew bi hembarî bikar anenî, bi çekê nobedê gênî.
Dewijê Yedî Kardeşlerî Bedrettîn înan dîyar kerd ke cerdewanan seba ke awa şimitişî yê dew bigêrê dest her cureyê tade kenî û wina vat: “Cerdewanîy bêyî agahîya dewijê dewa Yedî Kardeşlerî, seba çimeyanê awa dewê ma bibê dewa Yogurtluyê serî Qeyqamtîya Xîzanê de dayî û no berdişê îhaleyê la senî ma hesîya, ma kewtî mîyanê hewldanan. Ma heme şîyê Qeymeqamtîyê, Mudirtîya Karê Awê ya Dewletê û Îdareya Taybet û ma îhale da betalkerdişî.”
Înan da xuyakerdiş ke peynî no betalkerdişê cerdewanan gef înan ra wendî û wina dewam kerd: “Cerdewanî bi çekê xo ameyê dewa ma, ma ra vatî; ya şima awê bidê ya zî şima dewê biteriknî. Ma zî qebul nêkerd. Di şewa 23’ê hezîranê de dewa ma gulebaran kerdî. Homa kerd ke çikek bi kesî ra nêame.”
Ma bimrî nêdanî
Hewna dewij A.Î zî wina vat: “Awe hincet a. Armancê cerdewanan a ya ke çimê dewijê ma yê welatperwerê bitersnê. Seba tade û zilma dewletê ma nêçar mend 1994’ê koç bikerî. Dewa ma no demê hetê lejkeran ame vilakerdişî. 30 serran dewa ma vila mend. Çend serra ke ma agêrayay. Ma banê xo hewna bi destê xo viraşt. Ma sewalkarî ra dewam kenî. Ma awê seba şimitişê û seba dayişê erezîyan bikar anenî. Ma bimrî zî awa xo nêdanî cerdewanan û ma biryardarî.”
ZEYNEP KURAY / ANF