Demîrtaş’î va ‘eke şaredarîyanê ma perey rûsnayê koyan, mûfetîşanê şima çima nêşa çiyekê tespît bikerê. Demîrtaş îdîayê sermîyananê hikûmet yê derheqê şaredarîyanê DBP zey zûrîyê girdî hesibina û va: “Îdîa kenê ke, şaredarîyê ma, xizmetan nêkenê û pereyan rişenê koyan. Madem şaredarîyan perey rûsnayê koyan, o çax çira mufetîşê şima yê ke bi şew û roj şaredarîyan geyrenê, nêşayo çiyê îspat bikiro?”

Jew quriş zî xerc nêkenê
Demîrtaş'î qalê durustîn û xizmetê şaredarîyanê DBP kerd û wina va: “Embazê ma tenya xîzmetî esas gênê. Jew quriş zî, bîleheq xerc nêkenê. Xora bi sebebo ke goş danê şarî û bi îmkananê kemîya xîzmet kenê, benê hedefê sermîyananê dewlet.”
Demîrtaş'î vist vîrî ki Serokwezîrê verîn Ahmet Davutoglu zî tim û tim wekîlê HDP hedef girot û wina dewam kerd: “O şi Bînalî Yildirim ame. Davutoglu zey karkerê taşeron ê 4C bi. Vera Seraya Erdoganî bê erk bi. O çax ma ey aya kerd û va, ‘eke ti wina zey memûrê Seray bixeftîyê, o do meşt to çekero kêverî ver.’ Eke o çax meviradayê Cizîr de însanî ganî bi ganî biveşê, kesî nêşayê wina ey çekero kêverî ver. Nika zî Bînalî Yildirim zey ey ma sûcdar keno. Iyê ke welatî ray ra benê şimayê. Ko de beno û sûkan de beno, kotî jû bombe biteqo mesûlê ci şimayê.”

AKP sextekareyanê xo nimnena
Demîrtaş'î ard ziwan ke AKP bi raya medya sextekarîn û tiritoxînê xo şarî ra nimnena û va: “AKPyijî mal û peranê şarî tirenê. Sextekarîn kenê. Zûran kenê. Nûştoxî 50 hezar dolar maaş gênê û qelemşorînê AKP kenê.”

Demîrtaş'î hayr ant vengdayişê sawciyan ê serva îfade dayişê parlementeran ser zî û va: “Vanê wesaîtanê xo de tifîngî kirêştê. Coka vera ma, 550 fezlekey kerdê hadre. Edena de TIRê ke bi tifîng û cepxane dekerde  vînîyayî. Bi ê TIRan ê tifîngî berdî DAIŞî rê. Rojnamevanê xebera ci viraşt mehkeme benê û sawcîyê ke TIR vindernayî, wezîfe ra girotîyayî. Helbet zey wekîlî kemîyinê ma estê, la belê ma mal û pereyê şarî nêtiritî, sextekarîn nêkerd û pes paye nîyê.   

DÎHA/AGIRÎ