Heya, oncîya sîya der îme bawo, şîn der îme dayê, wayê, bira.. Şiware der îme heval!
Dejê ma rê, janê ma rê kes derman nêbeno, cîran. Kezeba man a ke bîya hîris û yew leteyî, kam pîşeno bira, kam? Şîn û şiwareyê ma rê her kes bîyo ker û lal..
Çimê aye akerde şî
Seke şima kî zanenê, anê rojanê verî daka Leyla şîye heqîya xo. Mi kî teze de dest bi nê nuşteyê xo kerdîbî ke na , xebera qetlîamê Pirsûsî zê bomba zereyê mezgê ma de teqe. No sebeb ra kî mi no nuşteyê xo nême de caverda, ez o oncîya kî kilmek tayê çîyan derheqê daka Leyla de binusî.
Kam se vano wa vaco, çimê daka Leyla yakerde şî.
Çi heyf ke daka Leyla kî bêveng helalîya xo waşte û werteyê qom û cîranê xo ra şîye. Seke yeno zanitene, çênaya Sey Rizayî daka Leyla Aglar-Polate 15. temuze edi Dêrsim de koç kerd û şîye heqîya xo.
Na rey a zulmê dewleta tirke ver nêşîyêne surgin, la na rey welatê bav û kalanê xo de, edi Dêrsim de, werteyê qomê xo de, werteyê zav û zêçê xo de xatirê xo waşt û bêveng şîye. La çi heyf ke çimê xo kî yakerde şî.
Xeylê zehmet û zilm vînena
Domananê Sey Rizayî ra juye a hona heyat de bîye. Daka Leyla serra 1918 de edi Dêrsim de ama rîyê dinya. 97 serrî bîye û qetlîamê 1937-38’ê Dêrsim de çênekêda azebe bîya. Qetlîamê Dêrsimî de edi Dereyê Laçî de a bi ju waya xo hîrê rojî ra tepîya binê 40 meyîtanê mordemanê xo ra birîndar xelesînê ra. Nê qetlîam û îdamê pîyê xo Sey Rizayî ra dime 5 serrî kî leweyê eskeranê suwarî de hepsî manena û xeylê zahmet û zilm vînena.
Daka Leyla bi derd û kulanê xo, bi ax û waxa pî û birayê xo, bi merex û bîrîye, bi hesret û axe şîye. Herçiqas ke mordemê aye vanê “ma de bê” kî, a nêşona û vana “Ez Dêrsim ra nêvecyena” Raştî kî aye Dêrsim nêterkit, çiqas ke çimê daka Leyla yakerde şî kî, welatê pî û birayê xo de, yanî virana Dêrsimî de şîye heqîya xo. Cayê xo wa werteyê gul û nurî de û werteyê gul û sosinanê koyanê Dêrsimî de bo!