8ê Adare, Vakûrê Kurdistanî ra heta Başûr, Rojawa ra heta Rojhelatê Kurdistanî bimbarek bi. Bimbarekîn ra vêşêr cinîyanê kurd, a roj çarnay roja têkoşîn û xoverdayîşî. Cinîyanê kurd 8ê Adare emserr bi tema ya “xobîyayîş” pêşwazî kerdî û waştena serbestîya Rayverê Şarê Kurd Abdullah Ocalanî ardî ziwan. Dersim ra heta Kobanê, Qendîl ra heta Hewraman zerrîyê cinîyanê kurd bi eynî waştenan da piro.
Dersim de cinî bi pêşengîye Platformê Cinîyanê Dersim de, Meydanê Seyît Riza de amey têhet. Hemverfeka HDK Gulîstan Koçyîgît û Parlementera HDP Leyla Bîrlîk ra pîya bi seyan cinîye Dersimiz tewrê nûmayîşa 8ê Adare bî.
Ma Dersim de bîme şahîdê xêlê qetlîaman
Nûmayîş de sifte Hemseroka Şûbeyê Dersim yê SESî Nurşat Yeşîl qesey kerd û vist vîrî ke sey cinîye Dersimiz iyê dê referandûmî de vajê nê. Yeşîl ra dima Hemverfeka HDK Gulîstan Koçyîgît qisey kerd û da zonayen ke tarîxê têkoşînê cinîyan de cayê Dersim cîya yo. Koçyîgît vist vîrî ke ê Dersim de bîye şahîdê xêlê qetlîaman û hina dewam kerd: “Zey cinîye Dersim ma vernîya qetlîaman de vilê xo çewt nîkerd. Ma bi rengê cinîyan xoverdayîşeke, vindertişeke, têkoşîneke vet werte. Ma yew cografyaya ke wazîyeno bîro çinî kerden ra yenî. Koyê ma wişt û berz ê, la ma kî sereberz ê. Ma 72 mîletan rê eynî nezerî ra weynenî.”
Dersimizan ser day la sirr nêdayî
Gulîstan Koçyîgît hayr ant atmosferê sîyasî yê Tirkîye ser û da zonayen ke nika Tirkîye kirêşîyena jew tarîtî mîyan. Koçyîgît ard ziwan ke jew sîstemo ke cinîyan însan bîyayen ra vistnenê înşa kenê û va, “Ma vîyarte de kî vernîya vîyarteye şima yê tarîye de bîat nîkerd, nika zî nêkenî, ma dê ameyox de kî nîkerê.”
Hemverfeka HDK Gulîstan Koçyîgît aşkere kerd ke Dersimizan xêlê ser day la qe sirr nêdayî.
‘Ma dê zonê xo ganî bikerî’
Koçyîgît 6 cinîye ke qezaya rayîre Bûrsa-Enqera de weşîya xo kerdî vindî vîr ard û hina dewam kerd: “Ma soz danê. Endî cinî dê nêbê gurekarê emegê ercan û yê ke sifte karî ra yenê eştiş. Ma vîyarte de têkoşînê nayî da, ma dê ameyox de kî bidê.”
Gulîstan Koçyîgît hayr ant zon, kamî û kulturî ser û va, ‘Herzewbîn ma dê têkoşîna kamî, ziwan û îtiqatê xo kî bidê.’ Koçyîgît aşkere kerd ke seweta kirêşnayenê kirmanckî nifşanê newî, gune cinî rol kay bikerê û dîyar kerd ke, endî zey cinî iyê dê ziwan û îtiqatê xo yo ke ver çinbîyayen de yo newe ra weriznê ser payan û biresnê nifşanê newî.
‘Sefer beno zafer nîbeno’
Hemverfeka HDK Gulîstan Koçyîgît hayr ant referandûmî ser kî û hina va: “Referandûmî de D’yê demokrasî, A’ya azadîyan çîn a. Elewitî çîn a, cinî çîn a. Seba xelesnayîşê xo, planê jew welatî kirêşnayîşê kindirî esto. Na, nê, hayir, oxî, ma pêrokîn zonan de vanê nê. Çike na tesleqa bingeya qanûnî ma temsîl nîkena. Dersim do 16ê Nîsane de morê xo bierzo Kurdistan û Tirkîye. Do vajo, Dersim rê sefer beno, la zafer nîbeno.Nika wextê wesarî açarnayîşê hamnanî yo. Her zimistan hamnanê xo esto, her şew sodirê xo esto, her zilm peynîye xo esto.”
Koçyîgît vist vîrî ke peynîye zilmê AKP nezdî beno û va, o tarîx kî 16ê Nîsane yo.
Botan ra heta Dersim selamê cinîyan
Parlementera HDP yê Şirnex Leyla Bîrlîk zî xîtabê cinîyanê Dersim kerd û aşkere kerd ke aye selamanê Sevêyan, Pakîzeyan, Fatmayan, Mehmet Tunçan û yê cinîyanê Botan ke “Çokan nêday ro” ardo.
Bîrlîk vist vîrî ke cayo ke cinîyan cuyayîş ronayo de cayê herb, rijyayîş û qetlîaman çîn o û hina va: “Bado ke zihnîyetê serdestan cinîyan dekerd keye, herb û qetlîamî zî destpa kerdî. Vera nê qetlîam û wehşetan de cinîyan bedelê giranî day. Clara Zetkînan ra heta Sakîneyan, Arîn Mîrkanan cinîyan bedelê girdî day. Kes nêşkeno vernîya cinîyan de vindero. Nika alwozê ma yê cinî, parlementer, hemşaredar zîndanan de hêsîr ê. Wa cinîyanê ke zîndanan de, cinîyê Êzidî yê Şengalî rê, û pêrokîn cinîyanê dinya ke xover danê rê selamî bo.” Qiseyan ra dima nûmayîş bi govend dewam kerd.
DÎHABER / DERSIM