Endama Koordînasyonê Komeleyê Cinîyê Ciwanan Pelşîn Munzure derheqê polîtîkayê dewlete yê ke ser cinîyanê ciwanan de meşnena û vera nê polîtîkayan de vindetiş û nizdîbîyayîşê rêxistina Komeleyê Cinîyê Cîwanan de qisey kerde û malumatanê muhîman daye.
Endama Koordînasyonê Komeleyê Cinîyê Ciwanan Munzure destpêkê qiseykerdişê xo de bale ante prosesê beşdarbîyayîşê xo ser û wina va: “O wext prosesê 15ê Sibate Komploya Mîyanneteweyî estbî û şarê ma vera komplo de xoverdayîşêko tarîxî nîşan dayêne. Dewleta tirk bi hawayo hovane hêrişê dayîke û cinîyanê kurdan kerdêne. Reyna vera cinîyanê ciwanan de fuhiş, tiryak û sewbîna ameyêne xebetnayîş û îradeya cinîyanê ciwanan hedef girewtêne. Heto bîn ra cinîyê ciwanî yê ke tayê polîtîk bîy, ê zî hetê dewlete ra ameyênê tepiştiş û tewqîf bîyênê. Herêmê sey Gabar, Oremar, Zap û sewbîna cayan de çalakîyê gerîla her ke şîyêne zêde bîyênê. Ez prosesêko winasî de beşdarê gerîla bîya. Çimkî têkoşîno ke tede keda cinîyan nêameyêne tirawitiş û cinîye tede rayberîye kerdêne, tena PAJK û PKK mîyan de estbî.”
Ma do na xete de bimeşyî
Munzure qiseykerdişê xo de manaya beşdarbîyayîşê cinîyanê ciwanan arde ziwan û wina va: “Raştîya xo de ma bi Rayber Apo bîyî ciwan û cinîye zî resaye cewherê xo. Têkoşînêko winasî yo zehmetin ma ra fedakarî û fedaîtî wazeno. Beşdarbîyayîşê YPJ, YJŞ, YPS-Cinî yeno manaya weçînayîşê cuya azade û redkerdişê sîstemî. Reyna yeno manaya seba cuyayîş şerkerdiş, seba şerkerdiş zî cuyayîş. Xoverdayîşê Xoserîye de şarî pey barîkat û meterîsan de vindetişê xo nîşan da. Seba ke vatişo peynî hetê xoverdakaran ra yeno vatiş, ma nêşênî zaf çîyan bivajî. Cizîr de Şehîd Axîne va ‘Ez wazena sey sembolê xoverdayîşî şehîd bikewa’ û wina zî bî. Rayberê Komeleyê Cinîyê Ciwanan qehremanê ke bîyî sembol, ê yî. Vera dagîrkerî de merdim senî xover dano, Rayber Apoyî nîşanê ma hemînan da. Ma zî do na xete ser de bimeşyî û têkoşînê xo gird bikerî. Zaf cinîyê ciwanî yê welatperwerî beşdarê têkoşînî bîyî û mil bi mile xover danî. Cinîya ciwane hêzê serkewtişî ya.”
Ma do xo kûr bikerî
Munzure qiseykerdişê xo de bale ante Kongreya Komeleyê Cinîyê Ciwanan ser û qiseykerdişê xo wina domnaye: “Sey ke yeno zanayîş ma temuza 2016 de Kongreya KJCyî viraşt. Ma kongre de plan û projeyê hîra amade kerd. Ganî ma goreyê serkewtişî bicuyayênê. Ma hetêk ra hewl danî hêrişanê şerê taybetan veng bivejî û heto bîn ra zî ma hewl danî ke cinîya ciwane bivejî teberê sînoranê dagîrkerîye. Ganî ti cinîya ciwane bêkomun nêmana. Vera heme hêrişanê îdeolojîk, sîyasî, ekonomîk, kulturî û sewbîna de xopawitiş seba cinîye çîyêko nêbo nêbeno yo. Vera şero ke Kurdistan de yeno cuyayîş de ganî cinîye mekanêko azad ke tede bişînbo hilme bigîra, awan bikera. Ganî cinîye fam bikera ke ancax bi şerkerdiş eşkena xo û şarê xo azad bikera. Ma tim hewl danî babetanê perwerde, sazî û dezgehanê xo awankerdiş û xopawitiş de xo hîna zaf kûr bikerî.”
Heta azadî ma do qet nêvinderî
Munzure dewamê qiseykerdişê xo de dîyar kerde ke tarîx înan ra wazeno ke ê heyfê nê zulmî bigirî û wina va: “Ma zî hewl danî no het de rol û mîsyonê xo bîyarî ca. Çimkî tarîx ma ser de cuya azade ferz keno. Nika heme parçeyanê Kurdistan û Ewropa de rêxistinîya ciwanan ameye awankerdiş. Cinîya ciwane ya kurd vera sîstemo ke hewl dano aye bêfelsefe, bêîdeolojî û bêpawitiş verado de xo rêxistine kena. Ma hewl danî na rêxistinî gird bikerî û vila bikerî. Ma do şorişê şarê xo û azadîya Rayberîya xo pîya aver bîşêrî û bi no hawa heme hêrişan veng bivejî. Rayberîya ma nê donemî sey ‘donemê pawitişê estena xo û qezençkerdişê azadîya xo’ şinase kerde. Ma cinîyî nêyî esas gênî. Ma do hetê leşkerî, polîtîk, kulturî û sosyal de rêxistinîya xo gird bikerî. Ma bi hawayo stratejîk nizdîyê perwerdeyî benî. Ma bi nasname û paradîgmaya xo û kêmanîya xo ser o vindenî û bi no hawa polîtîkayanê xo dîyar kenî. Ma do hîna gird bibî. Seba ma hetê fîzîkî de azadkerdişê Rayber Apoyî dûştê serkewtişê ma dîyar keno. Cok ra ma do heta serkewtişî ti netîceyî seba xo bes nêvînî.”
ZINARÎN CÛDÎ / ANF / BEHDÎNAN