SAFÎYE ALAGAŞ / JINNEWS/AMED


Tecrîdo ke Rayberê Şarê Kurd Abdullah Ocalanî ser o yeno domnayîş, her ke şono hîna zaf kûr beno. Tewr peynî ser medyaya komelkî de derheqê mergê ci de tayê xeberî ameybî parekerdiş. Cok ra şarê kurd seba Rayberîya xo etirîyeno û no aşmêk ra zêde yo ke payan ser de yo. 

Bitaybetî Kurdistan û Ewropa û xeylê welatanê dinya de kurd û dostê kurdan seba weşî, ewleyî û azadîya Rayberê Şarê Kurd Abdullah Ocalanî çalakîyan virazenî. Babete ser o cinîyê amedijî qisey kerdî. Cinîyan ra Halîme Ozdoganî tecrîdî şermizar kerde û wina va “Ganî tecrîd bêro wedarnayîş. Ewro neheqîyê ke zîndanan de yenî cuyayîş, xemê Erdoganî de nîyî. Ma wazenî wa dinya bibo cayêko weş. Problemê Tirkîya ancax bi Rayberîya ma çareser benî.”


Azadîye girêdayeyê Rayberîya ma ya

Cinîyan ra Songul Atake zî va ‘tecrîd îşkence û zulm o’ û wina dewam kerde: “Ganî demêko rewêr Abdullah Ocalan bireso azadîya xo. Ma cinîyî azadîya xo wazenî û azadîya ma girêdayeyê Azadîya Rayberîya ma ya. Eke ser Rayberîya ma ra tecrîd bêro wedarnayîş û bireso azadîya xo, o wext ma zî do azade bibî. Eke ma bitersî, ma nêşênî çîyêk bikerî. Neheqîyê ke zîndanan de benî, nînî qebulkerdiş. Ma do xover bidî.”


Ma azadîya Rayberîya xo wazenî 

Methîye Çakmake zî bale ante ser azadîya Ocalanî ser û wina domnaye: “Ma wazenî ke wa Rayberîya ma azade bibo. Heta ke Rayberîya ma azade nêba, ti kes azade nêbena. Xeberê ke vejîyayî, derheqê weşî û ewleyîya Rayberîya ma de etirîyayîşê ma zêde kerdo. Îstîxbarat, qoricî û ajanî heme koleyê dewlete yî û azadîya înan çin a. Ma xover danî û esîrîye qebul nêkenî. Ma azadîya Rayberîya xo wazenî. Azadîya Rayberîya ma azadîya şarê kurdî ya.” 


 Ma cuya Ocalanî ra etirîyenî

Berîtan Artişe zî dîyar kerde ke ê bi serran o ke seba azadîya xo têkoşîn danî û wina dewam kerde: “Wa tecrîd bi hawayo lezabez bêro wedarnayîş. Xeberanê peyênan ver etirîyayîşê ma zêde bîyo. Îzeheto ke hetê serdozgerîye ra ameyo dayîş, qîm nêkeno. Ma nêwazenî bibî koleyê ti kesî. Cok ra heta ke ma dest ra bêro ma do rasteyan de bibî. Ez hêvî kena ke nê rojê zehmetinî do derbaz bibî. Ma azadîya Rayberîya xo wazenî. Çimkî eke Rayberîya ma azade biba, ma do serbikewî.”