Cinîyê ciwanî yê Amedî qala referandûm û rejîmê yew kesî kerdî.
Cinîya bi nameyê Mîzgîn Turaye vist vîrî ke sîstemê yew kesî eleqeya xo bi sîstemê Amerîka reyde çin o û wina va: “Sîstemê Tirkîya de heme hukim û îdare dîyeno destê yew kesî. Cok ra ez referandûm de vana nê.”
Sîstemê padîşahî yo
Aysun Koçe qiseykerdişê xo de û wina va: “Eke referandûm de ‘ya’ bivejîyo do heme selahîyetî destê yew kesî de kom bibî, dima ra zî welat bi sîstemê ‘padîşahî’ îdare bibo. Na rewşe nîna qebulkerdiş. Çîyê ke nika yenê kerdiş, nîşaneyê çîyê ameyoxe yî. Sîstemê yew kesî do kaosî bîyaro.”
Cinîya bi nameyê Nezahat Gurbuze qiseykerdişê xo de bale ante rewşa welat û selahîyetê ke dîyenê destê yew kesî ser û wina va: “Çîyê ke AKP bi şarî dano antiş raste de yî. Seba ke ez nêwazena sîstem hîna bêrehm bibo, ez do referandûm de vaja nê. Ganî sindoqan de ameyoxa domanan bêro fikirîyayîş.”
Tarzê rejîmê yew kesî
Melek Zenole zî aşkere kerd ke ‘no sîstem tarzê sîstemê Amerîka nîyo, tarzê rejîmê yew kesî yo. Cok ra a vana nê.’
Buket Denîze zî qiseykerdişê xo de dîyar kerde ke do sîstemê yew kesî ra vaja nê û wina va: “Ez nêwazena karê dîn û devlete yew ca de bêrî îdarekerdiş. Tirkîya de xora sistemê yew kesî esto. Îqtîdar referandûm de wazeno ke her çî fermî bikero. Ez seba qedênayîşê bêkarî û welatêko azad vana nê.”
ANF/AMED