Cinîyî êzidî Reqa de ameyêne rotiş

Operasyonê Xezebê Firatî merhaleyo peyên de dewam keno. Hêzê Sûrîyeya Demokratîke (HSD) operasyonêkê bi nameyê ‘Şero Gird’ dabî destpêkerdiş û operasyon roja xo ya 9. de taxê Sînaa û Hattînî de dewam keno. HSD ziqaq bi ziqaq, cade bi cade û keye bi keye çeteyanê DAIŞî ra pak kenî. Heta nika çarçeweya operasyonî de bi seyan çeteyî ameyî kiştiş û bi hezaran merdimî ameyî xelisnayîş. Reqqaya ke eynî wextî de merkezê rotişê cinîyê êzidîyê ke hetê DAIŞî ra ameybî remnayîş yeno zanayîş, ewja de xeylê cinîyî zî ameyî xelisnayîş. Abdullah Mihemedo ke bazarê koleyan de cinîyêk herînabî, qala aqûbetê cinîyan kerd. 

Sey bazarê koleyan 

Mihemedo ke taxa Sehebîye ya Reqqa de ronîşeno, va ‘cinîyî bazaro ke rojhelat û başûrê bajarî de yenî awankerdiş de yenî rotiş’ qiseykerdişê xo wina domna: “Bitaybetî rojhelatê bajarî de cayêk taxa Sînaa de sey bazarê koleyan ameyêne xebetnayîş. Cinîyî hem roşîyayêne çeteyanê DAIŞî û hem zî roşîyayêne dewlemendanê Reqqa. Mi zî xeylê cinîyê esîrî herînayî. Raştîya xo de Reqqa de zaf cayan de bazarê cinîyan estî, labelê nînan ra yê ke ez qala înan kena, yê ke tewr zêde yenî zanayîş î. Mi ê bazaran ra cinîyêkê êzidî herîna. Wexto ke mi herîna, keso ke rotêne, 3 reyan va ‘Allah û Ekber’ û dima ra da mi. Cinîyanê ciwanan seba emîr û kesanê dewlemendan nimitêne. Bi hawayo vayî rotêne ê kesan. Teberê Reqqa de zaf kesan înan herînayêne.”

Ma teslîm kerd  

Mihemedî dewamê qiseykerdişê xo de va ‘bitaybetî cinîyê êzidîyî sey carîye ameyêne xebetnayîş’ û wina dewam kerd: “Cinîyî hema bazar de bi vatişê ‘Allah û Ekber’ êdî sey musluman ameyêne dîyayîş. Bazar de bi hawayo ‘nê cinîyî kesê ke seba îslamî şer kenî rê helal î’ ameyêne dîyayîş. Cinîyê êzidîyê ke mi herînayî bi aşman hetê mi de mendî. Ez hetê wijdanî de eciz bîyêne. Wexto ke ma eşnawit ke HSD ver bi Reqqa aver şono, ma reyna înan teslîmê çeteyan kerd.”

Heta Dûbaî zî roşenî 

Mihemedî va ‘zafaneyê cinîyan berdêne Erebistano Siûdî, Qatar, Dubaî û Dêra Zor’ û qiseykerdişê xo wina qedêna: “Emîrê ke Reqqa ra remayî, cinîyê ke herînayî zî xo reyde berdî. Yê ke teberê Reqqa ra ameyî zî nê bazaran de cinîyan herînayênê. Tayê reqqayijî zî nê cinîyan herînayênê. Tayê reqqayijî zî bîyî ortaxê nê sûcî. Nika taxanê zerreyînan de bi desan cinîyê êzidîyî yenî tepiştiş. Mi zî berdbî teslîmê DAIŞî kerdbî. Tayê şinasîyê mi zî wina kerdî.”