Festîvala Cinîyan a Rojbîne (Fîdan Dogane) ya 3. ya ke hetê Tevgerê Cinîyan ê Kurdan ê Fransa (TJK-F) ra ameye organîzekerdene Parîs de bi tewrbîyayîşê cinîyanê Kurdan û Fransizan bicoş ameye viraştene.
Festîvale bi şîarê ‘Xoverdayîşê Cinîye rayîrê azadîye akeno’ bi rêzgirewtiş û qiseykerdişê vervatoxanê TJK-Fyî Şengul Karaca dest pêkerde. Koordînasyonê KJKyî zî bi mesajêk festîvale silam kerde û mesajê xo de wina vato: “Bi na festîvale cinîyî vera sîstemî de bi hawayêkê cimatkî û kulturkî îradeyê cinîyan ramojnenê û her serre hîna bihêz benê. Ma omid kenê ke cepheyê cinîya demokratîke bi gureyanê winayênan rêxistinbîyayîşê xo gird keno û rolê xo yê tarîxî kay keno. Xora aktîvîteyê winayênî rengan û venganê cîyayan anê têhet û înşayê sîstemê konfederalîzmê demokratîkî rê xizmet kenê.”
Hemkoordînatora Partîya Çepe Danîelle Sîmonneta ke festîvale de qisey kerde, bale ante xoverdayîşê cinîyan ê Kurdan ser û paştdayîşê bi Cinîyan ê Kurdan û Festîvala Rojbîne ser o vindete.
Festîvale de ekîbê govende, Meral Alkane, Denîz Demane, Xecê Yaşare, Rûken Newa, Dîlana Rojarya û Pinar Aydinlare vejîyayî sehne. Domanan zî di parkanê cîya-cîyayan de û atolyeyan de wexto rind ravêrna. Standanê kitaban ê FEDA û Heyva Sorî ya pîya semedê paştdayîşê cinîyan ê citkaran ê Rojawanî yê ke dewleta Tirkî hêgayê înan vêşnayî, standêkê vilikan ame akerdene.
ANF / PARÎS