GULISTAN AZAK / JINNEWS / ÇEWLÎG
Cinîyî vera polîtîkayanê hukmatî ke cinîyan keye de hepis kenî de heme hetê cuye rêxistine kenî. Cinîyê Çewlîgî ke taxa Karşiyaka de manenî, şonî qursê neqiş kerdena kuya awî û bi no hawa hewl danî seba cinîyan warê karî biakerî.
No qurs roja ke abîyo ra nata raştê eleqeyêko gird yeno. Seba ke mesrefê resnayîşê kuyan erjan o, cinîyî kuyê ke bexçeyanê xo de resnenî, anî qurs de neqişnenî û çîyanê rindikan tira virazenî. Şagirdan ra Umran Gunana Aytaşe va ‘Çewlîg de fealîyetê hunerîye xeylê kêmî yî’ û wina domnaye: “Seba ke Çewlîg de muhafazakarîye hakim a, qursê winasî nêabenî. Seba ke zextî peynî bibî, ganî qursê winasî bizêdyî.”
Şagirdan ra Ozlem Yîgîte bale ante problemê ekonomîke yê qursanê hunerî ser û wina va: “Seba ke Çewlîg de qursê winasî rê eleqe kêmî yo, problemê madî zaf î. Ma nê kuyanî awîyan bexçeyê xo de resnenî û anî qurs de neqişnenî û kenî kel-melê tîtikî.”
Ganî cinîyî vajî ‘ez eşkena’
Şagirdan ra Ela Erkane zî dîyar kerde ke seba ke cinîyî xo aver bîşêrî, ganî cinîyî bêrî qurs û vajî ‘ez eşkena’ . Ela Erkane wina dewam kerde: “Xelqerê hunerî cinî ya. Eke cinîye biwazo, eşkena heme astengîyan derbaz bikera. Bitaybetî ganî cinîyê Çewlîgî gaman bierzî û vera zext û zorîya camêrdî de hunerî reyde eleqeder bibî.”