Amed de 23ê Kanûna 2017Î de kombîyayîşê ‘Cinîyê kurdî prosesî munaqeşe kenê’ ame viraştene û dima ra cinîyan çarçeweya xebata yewîya netewî de Platformê Yewîya Cinîyanê Kurdan awan kerd.
Endama platformî Ferda Cemîlogluye dîyar kerde ke cinîyî herçiqas ke zor û zehmetîyî zaf î zî munaqeşeyan domnenî. Cemîlogluye daye zanayene ke tayê endamê înan proseso peyên de ameyê tepiştene û wina domnaye: “Platformî cinîyan de bawerîye awan kerda. Platform hetê 7-8 cinîyan ra ameyo awankerdene. Na hemleyêka gird bîye. Xeylê embazê ma tepişîyayî û ma zaf problemî cuyayî. Labelê platform estena xo domneno. Reyna ma yenê têhet û xeylê çîyan ser o munaqeşeyan domnenî. Ma bi platformî her ca de hîna aktîf hereket kenî.”
Cemîlogluye dîyar kerde ke ê bi hawayêko hîra babeta kurdan û cinîyan gênê dest û daye zanayene ke polîtîkayê aştîyane yê cinîyan estê û cinîyî bin banê platformî de yenê têhet û munaqeşeyan kenî. Cemîlogluye tewr peynî ard ziwan ke ê sîyasetê mintiqa nizdî ra taqîb kenê û netîceyê munaqeşeyan de xebatan kenî. Cemîlogluye va ‘cinîyî pêl bi pêl gird benê’.
JINNEWS / AMED