15 sibata 1999î ra nata ser Rayberê Şarê Kurdî Abdullah Ocalanî de tecrîdêko girankerde domîyeno. 5ê nîsane ra nata zî bi ti hawayî keye, avûkat û heyetî reyde destûr nêdîyeno ke pêvînayîş bêro kerdiş.
Babete ser o cinîyî qisey kerdî.
Îdarekara DBPyî ya Bajarê Amedî Pinar Sakik Tekîne derheqê tecrîdî de wina va: “Ma tecrîdo ke Ocalanî ser de yeno meşnayîş qebul nêkenî. Ocalanî reyde bi aşman o ke têkilî nêameya ronayîş. Tecrîdo ke Ocalanî ser de yo, heme şarê dinya ser de yo. Ma heta ke Ocalanî ra xebere bigîrî ma do tena Tirkîya û Kurdistan de nê, heme cayanê dinya de têkoşînê xo yê huqûqî bidomnî. Birêz Ocalan, tena Rayberê şarê kurdan nîyo, rayberê şarê dinya yo zî. Ganî şexsê ey de reyna prosesê çareserî bêro destpêkerdiş û tecrîd bêro wedarnayîş. Ma sey şarê kurdî û cinîyê kurdan her ca de têkoşînê nêyî bidî. Ti kes do nêeşko Rayberê ma, bi ma bido vîrîkerdiş.”
Ma do rasteyan de bibî
Yildiz Damlaye va ‘raştîya xo de 18 serrî yo ke Îmrali de tecrîd esto’ û qiseykerdişê xo wina domnaye: “Kesê ke Rayberî ser de tecrîd meşnenî, şexsê ey de heme şarî ser de kenê. Rayberîye tena nîyo; bi mîlyonan kesî semedê ci têkoşîn dayî û bedenê xo dayê adirî ver. Rayberîye vernîya cinîyan akerd û cinîyan bi Rayberîye xo nas kerdî. Rayberîye bi mîlyonan merdiman hewn ra şîyar kerde. Ewro zî ganî ma semedê Rayberê xo têkoşîn bidî û ma bivejîyî rasteyan. Têkoşîn û xoverdayîşê şarî do nê tecrîdî biqedêno. Heta yew dilope gonîya ma bibo ma do seba Rayberê xo rasteyan de bibî. Heta ke Rayberê ma azad nêbo, şarê kurd û şarê dinya zî azad nêbenî.
Ma do peyser game nêerzî
Endama Meclîsê Dayîkê Aştî Leyla Aslane zî qisey kerd û wina va: “Tirkîya şexsê Ocalanî de heme kurdan tecrîd kena. Se beno wa bibo ma Rayberê xo ra, doza xo ra fek veranêdanî. Heta ke ma bicuyî ma do seba azadî şer bikerê. Wa baş bizanê ke ma do Rayberê xo ewca ra vejî û înan ra hesab pers bikerî. Ma wazenê ke wa bi hawayo lez tecrîd bêro wedarnayîş û wa reyna pêvînayîşî bêrî kerdiş.”
ŞÛJIN /AMED