Dayîkê Şeme ke serranê 90î ra nata çalakîyan virazenî û hewl danî aqûbetê merdimanê xo bipersî, raştê kerdişanê tewir bi tewiran yenî. Tewr peynî ronîştişê dayîkan amebi qedexe kerdene. Dayîkan ra Hanim Tosune reaksîyon nîşan daye û wina va: “Herkes zano ke çalakîya ma çalakîyêka bêvenge ya. Çira şima bêvengîya ma ra tersenî?”
Dayîkê Şeme 23 serrî yo ke Rasteyê Galatasarayî de bi çalakîyanê ronîştişî hewl danî aqubetê merdimanê xo yê vînîbîyayeyan bipersî. Wezaretê Karê Zereyî ke nêwazeno çalakî û vengê dayîkan bieşnawo, hewteya 700. de çalakîya dayîkan qedexe kerd.
Cinîya Fehmî Tosunî Hanim Tosuna ke zafaneyê emre xo Rasteyê Galatasarayî de derbaz kerdo, vera kerdişanê wezaretî de reaksîyon nîşan daye. Tosune va ‘ma şertanê tewr zehmetinan de daxî çalakîya xo domnaye’ û wina dewam kerde: “Ma zaf rojê zehmetinî dîyî. Seba ma heme çî ameyo qedexe kerdene. Ma tepişîyayî, kutikan erşawitî ma ser, îşkence û sewbîna xeylê çîyî kerdî. Ma qurnefîlî dayênê înan, ê ma tepiştênê. O wext ma îzehetê xo yo peyên Komeleya Heqê Merdiman (ÎHD) de da, înan berî ma ser o kilît kerdî û vatî ‘ma nêşênî ewleyîya şima bigîrî’. Labelê ma qet fek gêrayîşê xo ra veranêda. Ma hewl da ke vengê xo biresnî dinya.”
Tosune dewamê qiseykerdişê xo de wina va: “Ma do her roja şeme vera xo bidî Rasteyê Galatasarayî. Ma selahîyetdarê AKPyî ke wazenî çalakîye qedexe bikerî ra vanî ‘Çira ma ewja de roşenî, çira wextê OHALî de daxî nêame qedexe kerdene û ewro şima qedexe kenî?’ Ma nêzanî siba do se bibo. Ma do her hewte vera xo bidî Rasteyê Galatasarayî. Ma heta nika ewja de zirar nêdayo ti kesî û heqaretê ti kesî nêkerdo. Ma tena wazenî wa kerdoxê vînîbîyayeyanê ma bêrî dîyayene. Ma heqdar î û ma fek heqê xo ra veranêdanî. Ma do tepîya game nêerzî.”
Beno ke vatişê ma ra tersayî
Tosune qiseykerdişê xo de qala çalakîya dayîkan kerde û wina va: “Herkes bi hawayo baş zano ke çalakîya Dayîkanê Şeme çalakîyêka bêvenge ya. Ma nê dejî dî û ma nêwazenî ke ti keso bîn bivîno. No seba ma zaf muhîm o. Wa herkes destê xo rono ser wijdanê xo û vajo ‘eke merdimê mi zî vînî bibîyêne, mi do se bikerdêne?’. Gelo ê kesan şênayêne rehet rakewî? Hukmat destekan ra tersa û cok ra qedexe kerd. Ma nêyî fam nêkenî; çira şima bêvengîya ma ra tersenî? Ti muhîmîya vatişê Wezîrê Karê Zereyî Suleyman Soylu û Verfekê AKPyî Omer Çelîkî seba ma çin a. Senî ke ê bi hawayo cîddî nizdîyê ma nêbenî, ma zî vengê înan nêeşnawenî. Ma do tena reaksîyon nîşan bidî. Ti kes nêşeno dejê dayîkan îstîsmar bikero. Ma heqaretê herkesî tepîya teslîmê înan kenî. Heta nika ma se va, ma do nika ra pey zî wina vajî.”
Ez 9 serreyî ra nata tîya de ya
Kênaya Huseyîn Taşkayayî ke serra 1993î de ame vînî kerdene, Serpîl Taşkayaye zî qedexekerdişê hukmatî sey ‘şermê Tirkîya’ şinase kerde û wina va: “Serra 2011î de Serekwezîrê ê wextî Erdogan dayîkan reyde pêvînayîş viraşt û va ‘ma dejanê şima pare kenî, nika ra pey dejê şima yê min î zî’ û hêvî daye ma. Nika zî çalakîya ma qedexe kenî. Ez 9 serreyî ra nata tîya de ya û ma do fek waştişanê xo ra veranêdî. Ez do nika ra pey zî ewja de biba.”
JINNEWS / STENBOL