3 rojî verê Mehkemeya Heqanê Merdiman ya Ewropa (MHME) derheqê Selahattîn Demîrtaşî de qerar dabî û dîyar kerdbî ke ganî Demîrtaş serbest bêro veradayene. Dima ra Erdoganî îzehetê xo de vatbi ‘no qerar ma eleqeder nêkeno’.
Dadgerê MHMEyî yo verên û parlamenterê CHPyî yê Îzmîrî Riza Turmen, parlamentera HDPyî ya Anqara Fîlîz Kerestecîoglu û Prof. Dr. Yaman Akdenîzî qerarî ser o qisey kerdî. Turmenî ard ziwan ke no qerarê MHMEyî hem seba Tirkîye hem zî seba Demîrtaşî xeylî muhîm o. Turmenî va ‘eke Tirkîye goreyê nê qerarî hereket nêkero, do no tesdîq bikero ke tepiştişê Demîrtaşî huqûqî nê, qerarêko sîyasî yo’ û wina dewam kerd: “Rixmê protokolê MHMEyî de derheqê weçînayîş û weçînîyayîşî de şîroweyê xeylî tengî estê zî reya ewilêne hukm ameyo dayene ke tepiştişê sîyasetmedarêk îxlalkerdişê heqî yo.”
Turmenî vatişê Erdoganî yê ‘no qerar ma eleqeder nêkeno’ zî ercna û ard vîrî ke welatê ke endamê Konseyê Ewropa yê seba înan qerarê MHMEyî bestox ê û ganî goreyê ê qerarî hereket bikerî. Turmenî da zanayene ke Tirkîya ganî goreyê qerarî hereket bikero, eksê nê halî de do zextê hemverê ci hîna bibê vêşî. Turmenî da zanayene qerarê Demîrtaşî yê MHMEyî seba parlamenteranê tepişteyan ê bînan zî derbazdar o, muhîm o û qerarêko nimune yo.
AMED