Cewherê ola (dîn) îslamî de taybetmendeya aşîtî û demokrasîyî esto. Sewata nêy, hewce nêkeno kes nê taybetmendeyan sernewe ra pira bikero. Îslametey zî zey olanê bîn ê semawî, bi qalibanê nêyeno bedilnayîş ameyo piştene. Civak zî nêyî ana (wina-nîya) pejirnayo û ana bawer kerdo. Ayetanê qûranê firaze nêyenê bedilnayîş, merdim eşkeno ê ayetan şîrove bikero û mîyanê înan ra ê ke aşîtî, azadî, seypêyeyî û qomunaleyî fera kena, biveco raşte û dekero rojdemê merdimateyî.
Averberdişê cuyê komunaley
Heme olan de bawerey vernîyê heme çîyan de bo zî; heme olî, hetê bîn ra dinya de ganî merdimatî senîn bicuwîyê ser o de zî vindenê. Bêguman seweta dinya bîn zî tayîn rêzikanê înan estê. Merdim kamcînî biveco vernî a hetê olî yenê veynayîş. Merdim eşkeno vajo ke, Qûranê firaze dinya bînî ra vêşêrî na dinya ser o de vindeno û weledîyêyîşî ra heyanî mergî, heme heyamanê cûyayîşê civakî û qomunaley vejeno vernî zî, merdim eşkeno bivajo ke reyna ola îslamî yo. Ferasetê “ê ke emiryananê înan veyşan rakewenê, ma ra nîyê.” Teyna ola îslamî de bi vengêdo hentay berz vejîyena vernî. Reyna; pergalê ci yo îbadetî, serreyî ra heyanî peynî, xortkerdişê tekîlîyanê ciwakey û aver berdişê cuyê komunaley armanc keno.Armancê hurdina roşanan, pergalê nimazan û heme şertanê bingeyîn ê îslamî, averberdişê cuyê komalkî nawneno ma. Tîya ra zî yeno famkerdiş ke Hz. Mihemmed, muhîmeya civakî zaneno û bi heme hêzê xo wazeno cuyê komelkî bipawo. Merdim nêşeno vajo “Îslam, olekê komunalîst o.” Ana nîyo!
Îslamîyet cewherê ci ra dûrî fînenê
Ola îslamî de zî mezgê dewletî yê mêrdekî avera de yo. La belê na serdesteya dewletperesteyî, hentay dewletperesteya kapîtalîzmî merdimî û merdimateyî çîn nêkeno. Kapîtalîzm, civakî û bi aye ra zî merdimî werte ra wedareno. Dema civak bêro çînkerdiş, merdim û şexs zî zey masêyanê ke zeryayê înan ameyo miçiknayîş, do bêpawitiş bimanê û bi hetê mêtînkaranê bêwîjdan a gonîya înan bêro şimitiş. Seweta nêyî, kapîtalîzm ewro verê heme çî bi ola îslamî şer (lej) keno; wazeno ola îslamî raştey û cewhera ci ra dûrî bifîno. Çimkî; heyanî ke ola îslamî (tayîn bo zî) Rojhilata mîyanî de xo bido cuwînayîş nêşenê şaran bikerê koleyê xo û heme dewlemendeya Rojhilata Mîyanî bitirawê.Roja ma ya ewro de, ola îslamî di hetî ra ameya piştiş. Hetê ra îslama statûkoperest ê Muawîye, heto bîn ra zî mezgê îslamî yê modernîteya kapîtalîst na bawerîya qedîm ê Rojhilata Mîyanî raşteya xo ra xeylê vêşî dûrî vistê.
Îslamîyet goreyê menfeatê xo şixûlnenê
Rayver Apo, ola îslamî yê hegemonîk û dewletperest abirna di beşan. Nînan zî zey El-qaîde û Hîzbûllah bi name kerd. El-qaide, verfekêya ola îslama sûnî, Hîzbûllah zî verfekeya ola îslama Şia kenê. Hurdina îdeolojî zî û xet zî dewletparêz û antî-demokratîkî yê. Bê nînan Misirî de Îxwanî muslîmîn est o. Suîdî Erebîstan de Wahabî estê. Afganîstanî de Talîban esto. Tirkîyeyî de cemaatî estî û sn. reyna, nê welatan de Selefî û El-qaîde xo rê taban vîneno. Nê ekol û xetan ra yew zî demokratîk nîyê û heta merdim eşkeno vajo ke elaqeya înan bi îslamî ra nêmendo.Rewşa îslama Şîa zî înan ra cîya nîya. Çi Hîzbûllahê Lubnanî, çi zî mollayanê Îranî nêşenê îslama demokratîk temsîl bikerê û heme şaranê Rojhilata mîyanî bi na xetî verba azadî ra biberê. Çimkî ê zî îslamî goreyê menfeatê xo bi kar anê û kenê amûrê desthilatdareya xo.
‘Îslama Radîkal!’
Stratejîyê NATO-DYAyî merdim eşkeno vajo ke serkewte bî. Vernîya Sovyetan amebî girewtiş. La belê, persêdo newe vejîyabî asan: Talîban û El-Kaîde! Talîban, seweta Afganîstan şerîet waştêne û tewr pêynî de na waştena xo vist destê xo. DYA, pratîkê Talîbanî de rayîra dejenerekerdişê îslamî vînabî. Waştêne ferasetek îslamî yê ana awan bikerê ke wa heme şaranê muslîman îslamîyetî ra nefret bikerê û xo ci ra dûrî bifînê. Nameyê nêyî zî bibî El-Kaîde! Mîyanê Talîbanî ra rayvistena (rêxistin) El-Kaîdeyî vetî û yew prensê Siûdî ke (Bîn Ladîn) dostê Amerîka bî, ardî na rayvistena terorîst ser o. Vîrdozîya ci rê zî vatê “Îslama Radîkal!” Bi rayîra çapemenîya mîyan neteweyeyî, mîyanê çend aşman de heme cîhan El-Kaîde û Ûsema Bîn Ladîn sinasna.
Zey ke yeno zanayîş, esasê El-Kaîde bi destê DYA’yî ame eştiş. 1997’î de hêzanê yewîteya Sovyetî Afganîstanî dagir kenê. Hemverî na dagirkereya Sovyetan, heme cayanê cîhanê îslamî ra mucahîdî yenê Afganistan û hemverî Sovyetan dest bi şerî kenê. NATO zî di rayvereya DYAyî de, mucahîdan rê ardim kenê. Armancê NATO-DYAyî hemverî hîrabîyayîşê Sovyetan viraştişê kembera kewa yê îslamî bî.
Dejenere kerdişê îslama raşt
Modernîteya kapîtalîst, bi zanetey El-Kaîde populer kerd. Di semedê nêyî est bî. Yew; sîya û dejenere kerdişê îslama raşt, bî. Hetê ra El-Kaîde rê çalekîyanê wehşîyane denê kerdiş; El-Kaîde bin nameyê “Îslama Radîkal” de bi hezaran doman, cenî û kesanê medenî keşeno. Ladîn yan zî Zewahîrî vejîyêno ver ekranan û nê çalekîyan paweno; hem zî bi ayetanê Qûranî! Hemeyê cîhanî zî heme vatenanê nê ser-terorîstan, bi haweyêdo zîndî temaşe keno. Bi na hewa peyamê “Biewnê, îslam na ya; ola îslamî nêşeno şima bixelisno, ma nêbê se nê îslamîstê hovî dê şima heminan qetil bikerê!” danê ciwakî. Semedê diyîn zî; waştêne civaka xo îqna bikerê. Mêtînkeranê Rojawanî, no seserr o Rojhilata Mîyanî kerdî gola gonî! Verê, xebera kesî bîyîşanê ke erdanê ma ser o de benê de çîn bî. Êndî ana nîyo. Teknîk xeylê avera şîyo; heme kes, heme çîyan vîneno. Seweta nêyî zî lazim o ke şarê xo îqna bikerê ke çi gureyê înan nê erdan de estê? Seweta nêyî El-Kaîde û Ladîn vetî meydan. Ê terorîstan bi ola îslamîya zeliqnayî û şaranê xo zî bi nê hurdina fenomenan rey de ola îslamî ra zî dayî nefretkerdiş.
‘Terorîzma îslamî!’
Êndî ana bî ke şarê DYA û rojawanî rayveranê xo ra pers nêkenê nêvanê “çirê domanê ma Rojhilata Mîyanî de mirenê?” çimkî; semedê nêyî înan rê weş ameyo “damojnayîş”; “girewtişê vernîya terorîzma îslamî!” heke vernîya îslama radîkal meyero birnayiş se, no adir do bireso Awrûpa û Emerîka zî! Şarê xo ana îqna kenê!!! La ana nîyo! Modernîteya kapîtalîst, Boko-Haram ser o ra galaya îslama demokratîk kerdêne! Nê bûyeranê ana ra vêşêrî çîyên nêşena zeraro do ana giran bido ola îslamî.Ê diyîn zî; galaya DAIŞî yê hemverî kovara Charle Habdo bî. Zerreyê Parîsî de eştî kovarî ser û ser nameye ola îslamî bi desan rojnamevanî û nuştoxê namedar kiştî. Na bûyer zî bi rojan, heta bi aşman ame nîqaş kerdiş. Heme cayanê cîhanî de hemverî ola îslamî yew ewneyayîşêdo nêweş ame viraştiş.Bi seyan galayanê ana yê rayvistenê selefî estê. Ma weş zanê ke layê nê rayvistenan destê hêzanê modernîteya kapîtalîstan de yê. Bi ola îslamîya yew eleqeya înan zî çînyo. Merdim nê rayvistenan hemverî ola îslamî de eşkeno bica bikero. Hêzanê modernîteya kapîtalîst, bi destê çete û terorîstan, hemverî ola îslamî ana şer kenê. Çimkî; îslamîyeta raşt û demokratîk exlaq, manewîyat û nirxê ciwakî keno xorî; mîyanê xo de komunaley û civakey hewneno. Yanê, vîrdozîya îslama demokratîk vernîyê kapîtalîstan de zey dêsê xoverdayîşî yo. Wazenê nê dêsî bi rayîra çete û terorîstan holî ra wedarê.Polîtîkaya raşt ê ke bieşko nê galayan pûç bikero zî, hemverî nînan avera berdişê îslama demokratîk o.
KENAN AVCI / Zindana tîpa T ya SÊWREGÎ