Komeleya Yewitîya Ciwanêy Rojawan a Kobanê(YCR) ard ziwan ke înan xebatêy xo yê ke semeda serrgêra Şorişa Rojawanî ya 19’ê temmuze dabîy destpêkerdiş, bîyardo peynî. Na komele tena hetê sîyasî de xebat nêkena û heman wextî de ciwanê tîya pawitişê xo yê cewherî zî kenîy. Komele mîyan de polê çand û huner zî estîy û xebatêy çandî zî yenî meşnayîş. Hetê nînan de ciwan perwerdeya ziwanê kurdî, erebî, tirkî û îngîlîzî gênîy. Heman wextî de bin banê na komeleyî de Cenîyê Ciwanêy Demokrat zî cayê xo gênîy û xebatê xo domnenîy.
Cuyayîşê komînal
Ciwanê bi nameyê ci Aram Kobanê dîyar kerd ke ciwanêy Kobanê 19’ê temmuze de rolek gird girewtîy ser milê xo û no hawa dergeyî da qalîkerdişê xo: “Ma ciwanîy hetê yewbînan de têgêrayî. Wexto nêzdî şorişa Kobanê tena ciwanê Kobanê ney heme ciwanêy Rojawanî semeda şorişî wariştî lingan ser. Ma kobanê ra dest pê kerd û ma zîndana sîyasî girewt û heme embazanê xo yê sîyasî xelas kerd. Armanca ma ya ewil o yo ke ma Rojawanî de cuyeyek demokratîk û hembarr awan bikî. Ma do bi felsefaya modernîteyê demokratîk û bi rayîrê Serek Apo, cuyeyek komînal awan bikerîy.”
Ciwanê bi nameyê Mazlum Berxwedan zi dîyar kerd ke şorişa Rojawanî newe ra bîyayîşê şarê kurd o û no hawa vat: “Ma vernîya heme çî zihnîyetê kapîtalîst xira kerd. Zilma Esad hemverê kurdan vêşî bi û heme çî qedexe bi. Ma heme kar û xebatê xo bi limite kerdê. Şorişa Rojawanî heme dinya de olan da û ma eşkenîy vacîy ke hemînan rê bî finak. Semeda serrgêra şorişî zî ma bi xebatê xo kenîy.
Kurd newe ra amey dınya
Ciwana bi nameyê Gelhat Efrîn zî ard ziwan ke şorişa 19’ê temmuzê semeda kurdêy Rojawanî seyî ke newe ra amey dinya yo û wina vat: “Ma seyî ciwanêy YCRî dew bi dew, ber bi ber gêrenîy ke ciwananê xo beşdarê xebatan bikîy. Ma vernîya hemînan Rejîma Baasî mîyanê xo ra vet û kantona xo îlan kerd. Dima zî ma xebatê xo vêşî kerd. Wextê qirkerdişê peynî ya 25’ê hezîranî ke hetê çeteyanê DAIŞî ame kerdiş de şarê ma yo sîvîl ame qetilkerdiş. Ma her tim vanîy ke heta ke ciwanê ma bibîy çeteyê DAIŞî nêşkenîy şarê kurd têk bîşêrîy. Vengdayîşê min semeda heme ciwanêy Kobanê no yo ke, wa heme ciwan bêrî hetê ma, xo rayvistin bikerî û wa şar, herr û şorişa xo rê wayîr bivecîy.”