ŞOREŞ BENEK ROJNEWS / SILÊMANÎ Ciwananê Başûrê Kurdistanî 8ê Hezîrane de vera hêriş û dagîrkerîya dewleta tirkî de herêma Binarê Qendîlî de çalakîya tirsê ganîye daybî dest pêkerdene. Çalakîya ciwanan 2 aşman xo pey de verdaye û her roje hetanê cîya-cîyayan ra destekî dîyenî çalakgêran. 3 rojan de reyêk grûbêka cîyaye çalakîye dewr gêna. 11ê Temmuze de zî grûbêka enternasyonalîstan çalakîye dewr girewte. Seba ke Qendîl tarîxê kurdan de wayîrê cayêko stratejîk o, Qendîl ame weçînayene. Çimkî ciwanê Başûrê Kurdistanî zanî eke Qendîl bêro girewtene, seke Başûrê Kurdistanî bêro girewtene. Roja ke çalakîye dest pêkerde ra nata Silêmanî, Kerkûk, Behdînan, Çemçemal, Kelar, Germîyan, Ranya, Qeladiz, Teqteq, Koy, Sengeser, Penciwen ra xeylê ciwanî çalakîye dewr girewtî. Endamê Koordînasyonê Ciwananê Welatperweranê Kurdistanî Îsa Cengîzî zî îzehetêk da. Cengîzî qiseykerdişê xo de dîyar kerde ke ê hemleya serewedarnayîşî ke vera hêriş û dagîrkerîya dewleta tirkî de daya dest pêkerdene, bi hawayo qerardarî dewam kena û wina domnaye: “Ma çalakîya tirsê ganîye de 2 aşmî xo pey de verda. Heta ke tehlukeyê hêriş û dagîrkerîye dewam kena, ma do çalakîya xo bidomnî.”