Endamê Meclîsê Ciwanan yê HDPyî derheqê weçînayîşê 24ê Hezîrane de qisey kerdî. Ciwanan dîyar kerd ke ê prosesêko muhîm ra derbaz benî û wina domnayî: “Ma do nê weçînayîşan de ziqaqan de bibî. Ma do keye bi keye, ziqaq bi ziqaq, fabrîka bi fabrîka bigêrî û xebatan bikerî. Ma herkesî dawetê HDP kenî.” BÎLAL SEÇKÎN MA/STENBOL Her ke weçînayîşê 24ê Hezîrane hîna nizdî benî, xebatê weçînayîşî zî zêde benî û lez dîyeno xebatanê weçînayîşî. Heta nika namzedî zelal bîyî û îttîfaqî ronîyayî. HDP teberê îttîfaqan de ame verdayîş. Endamê Meclîsê Ciwanan yê HDPyî derheqê weçînayîşê 24ê Hezîrane de qisey kerdî û qala xebatanê xo kerdî. Ciwanan ra Edîbe Parlake dîyar kerde ke ê proseso ke ser cinîye de tedayî zêde benî ra derbaz benî û wina domnaye: “24ê Hezîrane eynî wextî de tarîxê azadîya cinîye yo. Ma do nê weçînayîşan de zî rasteyan de bibî. Çi destê ma ra bêro ma do bikerî. Nika HDP teberê îttîfaqan de ame verdayîş. Bi no hawa demokrasî nîna. Ê se bikerî zî HDP do qezenç bikero.” Ciwanan ra Yusuf Keleşî va ‘ma ciwanî kêfê ma HDP û Selahattîn Demîrtaşî rê yeno’ û wina domna: “Çimkî Demîrtaş bi vindetiş, huyayîş û nizdîbîyayîşê xo xîtabê ma ciwanan keno. Ma do hem xebatanê xo bidomnî û hem zî wayîrê sindoqanê xo bivejyî. Ma do sindoqan bêwayîr nêverdî. AKP û MHP seba ke partîyanê kurdan orte ra wedarnî, îttîfaq awan kerdî. Zîhnîyetê înan eynî yo. Heta ke HDP nêbo rejîmê yew merdimî xira nêbeno.” Ma do bibî vengê embazanê xo Ciwanan ra Zelal Çaglaye daye zanayîş ke ê ciwanî do vera çîyê ke benî de xover bidî. Çaglaye wina va: “Ewro 2 îttîfaqî awan bîyî û goreyê ma her di zî eynî yî. Lazimîya HDPyî bi ti hêzî çin a, tena sereyê xo zî eşkena serbikewa.” Sultan Çavdare qala muhîmîya ciwanan û rêxistinkerdişê komelî kerde û wina va. “Ma ancax bi rêxistinkerdişî eşkenî zorê faşîzmî bîşêrî. Ma do bi siloganê ‘Ma ciwan dest pêkerd û ma do bi ciwanîye serbikewî’ dormeyê Demîrtaşî de bibî yew.” Ma heme şaran dawetê HDPyî kenî Ciwanan ra Nîhat Demîrî zî wina va: “Ma do xebatanê xo ziqaqan de bidomnî. Ma do keye bi keye, fabrîka bi fabrîka bigêrî û xebatanê xo bikerî. No weçînayîş zaf muhîm o. Ma heme şaran dawetê HDPyî kenî. Ma eşkenî tena sereyê xo zî şêrî tura dîyine. Partîyê bînî do muxtacê ma bibî. Ma herkesî dawetê HDPyî kenî.”