Vera hêriş û dagîrkerîya dewleta tirkî ya Başûrê Kurdistanî de ciwanan 8ê Hezîrane de çalakîya tirsê ganîye daybî dest pêkerdene. Ciwanê ke Kampa Rustem Cudîyî de manenî, qisey kerdî û destek dayî çalakîya ciwanan. Heto bîn ra Pêşmergeyê Dêrînî zî dîyar kerdî ke eke Qendîl bikewo, Hewlêr û Silêmanî zî kewenî.
Dewleta tirkî vera Başûrê Kurdistanî de hêrişê dagîrkerîye daybî dest pêkerdene û demêko derg o ke hêrişî dewam kenî. Bitaybetî vera Biradost û Xakurkê de hêrişê teyarayan û leşkeran dewam kenî.
Ciwanê Welatperwerî û Cinîyê Ciwanî yê Têkoşerî 8ê Hezîrane de vera hêriş û dagîrkerîye de çalakîya tirsê ganîye daybî dest pêkerdene. Çalakîya ciwanan yew aşme pey xo de verdaye. Ciwanê ke Kampa Rustem Cudîyî de cuyenî, îzehetêk dayî û seba çalakîye destekê xo aşkere kerdî. Ciwanan vera hêriş û dagîrkerîye de reaksîyon nîşan da.
Ciwanan ra Mazlûm Tokî dîyar kerd ke ê destek danî çalakîya tirsê ganîye û wina va: “Donemo peyên de îzehetê Nêçîrvan Barzanîyî rojeve de yo. Herinda ke dewleta tirkî sey dagîrker bivîno, PKK sey dagîrkerî nîşan dano. Nê vatişî mîyanê kurdan de îxanet kûr keno û yewîya kurdan xira keno. Ma ciwanî do hewl bidî vera nê vatiş û kerdişan de bivinderî.”
Ciwanî rayberê komelî yî
Ciwanan ra Çîdem Demîre zî daye zanayîş ke aye veng dana cinî û ciwanan ke wa destek bidî ciwanê ke vera hêriş û dagîrkerîya dewleta tirkî de bedenê xo kerdî sîper.
Cîhat Gungenî zî va ‘o destek dano çalakîya ciwanan û çalakîya ciwanan silam keno’ û wina domna: “Ma hêriş û dagîrkerîya dewleta tirkî şermizar kenî. Ganî ma vera hêriş û dagîrkerîye de bivinderî. Ganî ciwanî vera kayanê dewleta tirkî de bêveng nêmanî.”
Ganî ma pêro pîya hereket bikerî
Ciwanan ra Berxwedan Karayî zî wina va: “Sere de ciwanî û herkes ganî vera dagîrkerîye de bivinderî. Hêrişê dagîrkerîye yê dewleta tirkî do nêşênbî îradeya kurdan bişikno. Ganî ciwanî heme cayanê Kurdistanî de vera dagîrkerîye de bivinderî. Ganî ma pêro pîya hereket bikerî.”
Eke Qendîl bikewo, Hewlêr û Silêmanî zî kewenî
Heto bîn ra Pêşmergeyê Dêrînî yê Başûrê Kurdistanî zî vera dagîrkerîye de reaksîyon nîşan dayî. Pêşmergeyan qiseykerdişê xo de bale antî yewîya neteweyî ser û qala ruhê têkoşînî kerdî. Pêşmergeyan dîyar kerd ke dewleta tirkî PKK kena mehne û hêrişê cayanê sîvîlan kena û wina dewam kerdî: “Nê hêrişan ver welatîyê sîvîlî zirar vînenî. Dewleta tirkî bêvengîya hukmatê Îraq û Miletê Yewbîyayeyî erdê Başûrî dagîr kena. Eke dewleta tirkî bikewa Qendîl, nêşêna ewja ra bivejîyo. Kewtişê Qendîlî yeno manaya kewtişê Hewlêr û Silêmanîye zî. Cok ra ganî herkes vera hêriş û dagîrkerîye de bivindero.”
MERKEZÊ XEBERAN