Qezaya Sîlopî ya Şirnexî de, bi serkêşîya şaredarîye ya Partîya Demokratîke ya Şaran (HDP), vera fihûş û tiryako ke nê demanê peyênan de bajar de zêde bîyo, şayîya ciwanan ameye viraştene. Şayîye wareyê Newroze de ameye viraştene. Parlamentera HDPyî Dersîm Dage, Nûran Îmîre û Huseyîn Kaçmaz, hemşaredarê bajarî, rayberî û xebatkarê şaredarîye û bi hezaran kesî beşdarê şayîye bîyî. Şayîya ke zafaneyê ci ciwanî beşdarê ci bîyê de, grubê muzîkî Umut Botan, Vengê Cinîyanê Azadan û Koma Gulê Xerzan vejîyayî sehne.
Badê ke wekîlanê HDPyî girse yew bi yew silam kerd, parlementera HDPyî Dersîm Dage qiseykerdişêko kilm kerd. Dage bale ante prosesê çalakîyanê grevê vêşanîye yê vera tecrîdkerdişê Rayberê Şarê Kurdî Abdullah Ocalanî ser û wina va: “Vengdayîşê Ocalanî ra dima çalakîya grevê vêşanîye qedîyaye. Ma newe xoverdayîşêkî ra vejîyayî. Ma çalakîya xo de ser kewtî.”
Dage veng da ciwanan ke wa meclîsê ciwanan ê HDPyî de xo rêxistine bikerê û wina qedênaye: “Heta ke ciwanî bibê, faşîzm do ti caran ser nêkewo.” Qiseykerdişê Dage ra dima bêmabên seba Ocalanî û vera fihûş û madeyê tiryakî de siloganî ameyî eştene. Şayîye heta saetanê ereyê şewe dewam kerd.
MA / ŞIRNEX