Şahidanê hedîseyê Farqînî ke netîceyê ci de 6 kesî merdbî û 9 kesî zî birîndar bîbî, qisey kerdî. Şahidan dîyar kerd ke înan hemînan zanayo ke do hêriş bibo û xebere daya qereqolî, labelê ti tedbîr nêameyo girewtene. Şahidan da zanayene ke qereqol 10 kîlometre durê taxe de yo, labelê leşkerî bi saetan ra dima ameyî cayê hedîseyî.

ARJÎN DÎLEK ONCEL / MA / AMED

21ê Tebaxe de qezaya Farqînî ya Amedî de taxa Reşikî de qoricîyan bi sîlehanê luledergan hêrişê keyeyêk kerdbi û netîceyê hêrişî de 6 kesî merdbî û 9 kesî zî birîndar bîbî. Şahidanê hedîseyî derheqê hedîse de qisey kerd û hedîse sey qetlîyamî şinase kerd. Şahidan da zanayene ke cendirmeyî hedîse ra dima ameyî taxe û wexto ke birîndarî neqlê nêweşxane bîyêne, leşkeran wesayîtî vindarnayî û bîyî sebeb ke birîndaran ra tayê ci bimirî.

Bi nameyê Enver Tekînî de kesêk kênaya xo Gulşene daybî keyeyê Poyrazan û seba ke tehdîdê kişîyayîşî, kênaya xo arda keyeyê xo. Dima ra keyeyê zamayê ci ke qoricî bi, hertim ci tehdît kerdo û vato ‘yan ti kênaya xo kişenî, yan zî ma aye kişenî’. Tekînî 20ê Tebaxe de şîyo qereqol û dîyar kerdo ke ewleyîya canê înan çin a. Herçiqas ke xeber dîyaya qereqolî zî hêriş bi.

21ê Tebaxe ereyîya şewe de tewr tay 10 qoricîyan hêrişê keyeyê Tekînî kerdo. Herçiqas ke Muxtarê dewe xebere daya qereqolo ke 10 kîlometre durê taxe de yo zî, fermandarê qereqolî ewleyîye kerdo sebeb û vato ‘ma nêşênî bêrî’.

Şahidê hedîseyî ra Mehmet Emîn Yildirimî va ‘wexto ke hêriş bi, leşkerî 300 metre durê taxe de bîy’ û wina domna: “Labelê înan mudaxale nêkerd. Qoricî Zeynel Poyrazî xo qula merdîwanan de nimitbi û ewja ra hêrişê endamanê keyeyî kerdêne. Ez vejîyaya bexçe, mi dî ke vengê sîlehan yeno. O wext Edîp Ograş bi wesayîtî ameyêne keyeyê xo. Keyeyê ci hetê keyeyê Tekînan de bi. Mi ci ra va ‘meşo’ labelê goş nêda mi. Senî ke şi 2 guleyî ginayî ci. Qîrayîşê cinîyan her cayî ra ameyêne eşnawitene.”

Dayîke seba domananê xo merde

Yildirimî dewamê qiseykerdişê xo de wina va: “Dima ra Cevat Narîn ver bi hedîse şi û va ‘Seba Homayî bivinderê’ labelê o zî singê xo ra birîndar bi. Cinîyêk qîrayêne û vatêne ‘Datê mi Cevat merd’. 2 birazayê Cevatî Azîz û Gokhan Narîn zî ver bi hedîse vazdayî, her di zî ewja de kişîyayî. Dayîka înan Halîse Narîne zî ver bi domananê xo şîye, labelê aye zî kişîyaye. Munevver Narîne zî seba ke birîndaran bixelisno şîye, birîndar bîye. Qetlîyam bi saetan dewam kerd. Leşkerî 3 saetî ra dima ameyî taxe. Ma waşt birîndaranê xo bikirêşî nêweşxane. Ma birîndarêk berd nêweşxane û ê bînî berd teberê taxe. Ambulansî ewja de bî. Heta ke ma yenî taxa xo, ma 4 nuqtayan de yenî vindarnayene. Labelê ê qoricîyî senî bi hende sîlehan derbaz bîyî?

Leşkerî bîyî sebeb ke Munevver bimiro

Şahidan ra Mehmet Îkram Yakişanî va ‘Enver Tekînî hedîse ra ver xebere daybî qereqol û ma hemînan zanayêne ke do hêrişêko winasî bibo’ û wina va: “Labelê leşkeran ti tedbîr nêgirewt. Heta keyeyê Tekînî ra vatbi ‘Heta ke ma tîya de yî, çîyêk nêbeno.”

Şahidêko bîn Ferît Kadahî zî wina va: “Taxe 10 kîlometre durê qereqolî de ya û hedîse 5 kîlometre durê qereqolî de bi. Wexto ke ma birîndarî kiriştêne nêweşxane, hetê leşkeran ra ma ameyî vindarnayene. Leşkeran waşt bi saetan wesayîtan bivindarnî û bisehnî. Ewja de Munevver Narîne netîceyê şîyayîşê gonîya zafe de merde.

Tedawîya birîndaran dewam kena

Cayê hedîseyî de hîna zî qalikê guleyan estî û kesê ke destek dayî hêrişî hîn vînîbîyaye yî. Netîceyê hedîseyî de Munevver Narîne, Halîse Narîne, Azîz Narîn, Gokhan Narîn, Edîp Ograş û Suleyman Eleftoz merdî. Reyna Teymen Yapici bi hawayo giran birîndar o û bêxera ci Munevver Bagli, Haci Cevat Narîn, Felat Narîn, Mevlut Narîn, Ferhat Tekîn, Ferhat Narîn, Cevat Narîn, Dukhan Narîn û Mehmet Narîn zî birîndar bîyî û tedawîya înan dewam kena.