Komxebatê Pîranê Alewî ‘Raya Heq’ ke, hetê Komeleyê Alewiyê Demokratîk organîze beno, roja şemî (30ê Çile) destci kerd vizêr qediya. Wekîlê HDP yê Dersimî Alîcan Onlu û Hemşaredara Dersim Nurhayat Altun ra piya, bi desan kes tewrê kombiyayin bî. Komxebato ke bi slogana ‘Rayîr û erdê xo yê fîrazî ra wayîr bivejî’ viraziya, bi duayan û veşnayîşê çirayan dest ci kerd.
Ageyrime cewherê xo
Serokê Peroyî yê Komeleyê Alewîyê Demokratîk Nesîmî Genlîkî qiseyê akerdenê komxebatî kerd û hayr ant sebebê viraştişê komxebatî û kiltûrê alewitî ser., Peycoy azayê DAD’î Huseyîn Ozan qisey kerd û ciresna ke ganî kesê ke rayîrê riza de yê, bi riza bêrî pêşwazîkerdiş. Ozan’î vist vîrî ke, “têgeya riza ewro tenya miyanê ocaxan de yena şuxilnayîş” û niya va: “Ocaxî seweta çerekerdişê pêro probleman û cuwyayişê azad, zey meclîsî wezîfe kenî û sîstem zî wazena nê ocaxan xirab bikero. Eke şima raporê Dêrsimî ra biewnî şima vînenê ke, senî wazenê ocaxan vila bikerê û bigîrê bin qontrolê xo.
Ozan’î aşkere kerd ke, sîstem her tim waşt ke alewî rayîrê xo ra bivejî û seba nay hewl dayî û qiseyê xo niya ramitî: “Eke ma cuwyayişê azad û zeypêbînî wazenê se gune ma ocaxanê xo ra wayîr bivejî. Ger ke ma bi saya ocaxan de manaya eşq û rizayî biakerî, o wext tenya aştî manena û dagirkerî wedaryena. Lazim o ma bişînbî biagêrî cewherê xo.”
Vera zaliman dekewime hereket
Hemserokê DAD yê Stenbolî Bulent Felekoglu zî ard zon ke alewitî de çewresî yeno maneya cuwya newe û niya va: “Çewres, newe ra ameyîşê dinya ano ziwan. Kilturê cenîya dayîke de zaf humarî de ravêreya di ganitî her tim bi çewres rojan yenî bi manakerdiş. Seweta pitikî zî heta ke çewres rojê pitikî nêqedîyo nêşkeno bivejyo gerdunî û nêvejyayîşê ci zî no semedî ra yo.” Felekoglu hayr ant biyayişanê ke Cizîr de qewimyenê ser û niya va: “Cizîr de ver çimanê her kesî de, seserra 21’în de Kerbelayêke yena cuwyayiş û lazim o ma vernîya na Kerbela bigîrî. Gune ma dûstê zilmo ke o bodrumî de yeno cuwyayiş dekewî hereket.”
Wazenê muqadesînê ma bigîrê
Roniştişê ‘Raya Heq de ziwan û xozaya ma’ de Pîrê Ocaxê Sevdîn ra Pîr Hasan Sonmez’î qisey kerd û hayr ant muhîmiya piya hereket kerdişê bindestan ser. Sonmez’î va, serva ke, hometa xo gonî ra, doman û ceniyan merdiş ra bixelesnime, gune ma bi serdest û kiştoxan nê, bi yê ke hetê însanî de rê ra, piya bi me. Ocaxê Avûçan ra Pîr Hasan Genç’î zî, vengê qedînayişê qetlîamê ke Kurdistan de benê da.
Delegasyonan ra Zeynel Kete zî vist vîrî ke, rexmê qirkerdinan, ziwanê ma ser payan de mend û niya va: “Îtiqatê ‘Raya Heq’, ma rê zonayişê pawitenê pêrokîn îtiqatan da. Bimbarekî û civakbiyî piyayî ya. Serva ke, mûqadesiya ma xirab bo, hewl dayê civakbiyîna ma xirab bikerê.
Kete vist vîrî ke, goreyê alewitî, cayê mûqades, dar û awe, kemer û vaşî muqadesê û niya va: “Waştî, çiyê ke hetê Heq rayşinê ma ra bigîrê. Hewl dayî mezelxaneyê ma, ma ra bigîrê. Tarixê ma de, mezelxaney bimbarekîyê tewr girdî yê. Nayî ra, hona kî erzenê mezelxaneyanê ma ser. Ronişteyanê vizêr yê komxebatî de, ‘Îtiqatê Raya Heqî de cayê cenî’, ‘Îtiqatê Raya Heqî de vizêr û ewroyiya kiltûr û îtiqatî’ amey qisey kerdin.
Gola Çetû de damûstayîn
Heta bîn ra, Pîrê ke tewrê komxebatî benê, bi wesîleyê aşma Xizirî, Gola Çetû de vizêr damûstayîn day. Damustayin de hayr anciya qetlîamanê AKP yê ser.Pîran aşkere kerdî ke, gune vera qetlîaman bêveng nîro mayin û venga berzkerdişê tekoşîn day. Damûstayin de vajiya ke, zewbîn Dergah û Pîrî, ma ra hesabê bêveng mendiş perskenê.
DÎHA/DERSIM