Rewşa Cizîrî ser hemsereka Komeleya Huqiqnasî yê Azadîwaşt (OHD) Banu Guveran aşkera kerd ke nika Cizîr de polîs û lejkerî kenî heme sûco merdimatî yê, wa heme huqiqnas û şaran wayîrê Cizîrî bivejî û bêhuqiqîyo ke Cizîrî de yeno şuxulnayîş bivînî.
Rewşa îstîsnayî esta
Hemsereka OHDe Guven destnîşan kerd ke meqanûnê dewletan de rewşa îstîsnayî esto û kam rewşe de zî yenî şuxulnayîş dîyar î û taybetê rewşê ‘Qewimyayîşê îstîsnayî’, ‘Qewimyayîşê xozaye’ û ‘Qewimyayîşê şîdetî’ de yenî îlankerdiş, nika Cizîrî de yew rewşa îstîsnayî esto labelê rewşa îstîsnayî nêameya îlankerdiş û wina vat: “Seba îlankerdişê rewşa îstîsnayî, serekîya Serekkomarî de Lijneya Wezaretan eşkena bir biga û peynî zî na bir zî şerto ke mohrê Meclîsî ra bivîyaro, xora Meclîs bir nêdo rewşa îstîsnayî nîno îlankerdiş.”
Cizîr de şer esto
Banu îzeh kerd ke ê seba Cizîr de hewanayîşê qedexeyan çend ra serpirodayîşê kerdî labelê ê verbê xo de yew muxatab nêvînayî, çimkî Tirkîyaye de bi aşkera serekkomar vat ke rejîm bedilyayo, çew nêeşkeno serekkomarî ra bireso û heme adlîye û dadgerî binê tesîrê ci de yî.
Banu wina dewam kerd: “Normal de şerto ke dadger û dozgerî bêhet têbigêrî, Yewîtîya Baroyan zî daxîl nika pêroyî raşteyê huqiqî hembarê şerî yî. No ser zî ma qet nêeşkenî adlîyeyan de xebat bikerî, ma çiqas îtîrazê xo zî bikerî ma adlîyeyan nêeşkenî bidê xebitnayîş. Nika Cizîr de sûco merdimatîyî yeno şuxilnayiş, dewleta tirk çikekî şer de nêeşkena bikera Cizîr de bi aşkera kena. Çew demê şerî de daxî nêeşkeno nêweşxane, dermanxane û firanan biqefelno. Hewna çew nêeşkeno merdimo sivîl ra çekê xo bitado. Heme nê kerdişê dewlete sûco merdimatî yê. Dewlet wazena Cizîr de bi rehetî qirkerdiş bişuxulna, no ser zî destûr nêdana ke lijneya HDPe bikewî Cizîrî. Ma do Komeleya Huqiqnasî yê Mezopotamya reyde Cizîrî ra şîrî, çimkî ma wazenê Cizîr de çi qewimyeno se Dinyaye ra bidê famdayişî.”
Ferasetako şerhes
Banu bal ant ser qirkerdişê Cizîr û hêrişî ke ser HDP yenî kerdiş û ciresna ke her kes zî zaneno Cizîr nê sifteyin nê zî peynî yo û wina vat: “Çi heyf ke HDPe ra hêrişê bi organîze yenî kerdiş labelê çapemenîya AKP nê hêrişkarê faşîst zey dorûverê hassas nişan dana û guya nê kesî faşîst bertekê xo yê demokratîk nişan danî la demê ke ma seba aştîye çalakîyeke virazenî, polîsê AKPe terorîzm reyde ma ra hêriş kenî, qet polîs û lejkerê AKPe ma ra hêrişkerdiş de problem nêvîneno, no zî bi aşkera cîyakerî û îlankerdişî şerî yo.”
JINHA/STENBOL