Çeteyê AKP her çî kenê hedef
Qezaya Şirnex Cizîr de 44 rojiyo vera herbê bêexlaqî û bêsînor yê dewleta Tirk xoverdayişê do destanî yeno dayen. Nika êrişê çeteyanê AKP vera mehleya Cûdî bî jêde. Tîmê teybet kêberê xeylê keyeyan şikinay û açarnay zey qerargeh. Keyeyê taziye yê Cûdî zî ame texrîbkerdiş.
Veriya 4 rojan, netîceyê top erzayiş de 25 kesî bî dirbetin. Nê dirbetinî jew bodrimê banî de yenê vindernayen, gonî kenê vinî, û benê hedefê êrişanê dewlet. Dirbetinan ra, Cîhan Karaman û 2 kesê bîn, yê ke rexmê qerarê Mahkemeyê Heqê Merdiman yê Awrûpa nêhewediyay nêweşxane weşiya xo kerdî vinî.
Malzemeyê tibî nêmendî
Bado ke, adresê ke dirbetinî manenê sermiyananê midûriyet rê ame dayen, vera bana dirbetinan bombevornayenî bî jêde. Hemserokê Meclîsê Şar yê Cizîr Mehmet Tûnç’î aşkere kerd ke, malzemeyê tibî yê mudaxaleyê lezgîn nêmendê. Tûnç’î da zonayene ke, jew welatijo ke, şi dirbetinan rê aw biyaro, bi hedefê polîsê hereketê teybet û destê xo ra bi dirbetin. Tûnç’î va, dirûmê dirbetinan her ke şino beno giran, dirbetî boy danê.
Wa merdimatî xo ra şerm bikero
Welatijan ra Mahmût Dûymak, o ke dirbetinan het de yo zî, bi raya telefon wina veng da raya pêroyîn: “Şima ferqê qetlîama Cizîr de yê. Ez 28 rojiyo tiya de ya. Êrişê ke qewimyenê, merdimatî danê şermnayiş. Tiya de domanê 13-15 serreyî gan day. Dirbetinî estê, werdiş û aw xo ra çinya. Merdimatî kotî de ya? Ê dê kamî rê hesab bidê, şewra dê meyitanê ma ra hesab bidê? Ez veng dana merdimatî. Wa merdimatî xo ra şerm bikero. Gerek yê ke xo ra vanê ez însana, verê xo açarnê Cizîr û mudaxaleyê tiya bikerê.
Qeza de, 2 cenazeyî hewadiyay morgê nêweşxaneyê Şirnex. Cenazeyan ra jû yê Rizgar Yildiz ke serra 1991î de Cizîr de ameyo dinya ya. Derheqê cenazeya bîn de zonayişî nêamey giroten. Azayanê YPS û YPS-JIN yê ke Botan de vera êrişan xoverdanê aşkere kerdî ke, ê ebi rihê serkewtiş yê Kobanê pirodanê. Lejwanan aşkere kerdî ke, heta çilka peynî yê goniya xo ê dê vera polîtîkayanê qirkerdin yê AKP xover bidê.
Heta bîn ra, Komîsyonê Hiqûq yê DBP, derheqê polîtîkayê herb yê AKP de damûstayin da û aşkere kerd ke, 24ê Temûz ra heta na het 259 kesê sivîl amey qetilkerdin.
DÎHA/ŞIRNEX