Kurdistan’î de her roj bedêl ser bedêl yeno dayîş. Gonî yena dayîş. Ganî yenê dayîş. Erdê Kurdistan’î pê gonîyê şehîdan yeno awdayîş. Farqîn de hina bi. Derîk de hina bi. Kerboran de hina bi. Silopîya de hina bi. Cizîra Botan de hina bi. Nisêbin de her roj hina beno. Amed-Sur (Bedenê Amedê) de hina beno.
La ma seba çi ewqasî bedêlan danî? Pêronê nê bedêlan seba ke Kurdistanekê azad awan bibo yenî dayîş. Sey Şaîro Pîl Baba Tahîre Uryan na derheqî de yew şîîre xo de bi lehçeya Kurdî Lorikî de hina vato.
“Çû mû yek sûtedil
perwaneyî ne
Be alem hemçû mû
dîwaneyî ne
Heme marûn û mûrûn
lane dîrun
Menê dîwane ra wîraneyî ne”
Kirdkî de na şîîrî hina ya:
“Sey min perwanêk
zerrî veşayî çino.
Dinya de dîvaneyêk
sey min çino.
Hêlîna heme mar û
morcelan esta.
Qey dîvaneyêk sey min
vîranêk çino.”
Sey Şaîro Pîl Baba Tahîre Uryan vato eynî hina yo. Dinya de herkes welate xo de azad ciwîyeno.
Pêro mar û morcelayî wayîre hêlîne. La ma kurdî û welate xo Kurdistan’î de sey vîraneyî. Seba ke ma hale hina ra xelas bibi, ma ewqasî bedêlan danî. Neyare ma neyarêk hina yo ke, dinyade sey nê neyarî çino. Dewleta Tirk, Cizîra Botan de verê cû banên ke birîndar têde mendenê pê TNT û C4 teqnayê û ser birîndaran rijnayî. Dima ra benzîn kerd pêronê înan ser û veşnayê. Neyare ma neyarêk hina wehş o.
Baba Tahîre Uryan şîîre xo yê bîn de seba neyare hina bi Lorikî nuşto.
“Ezîza merdî ez namerdî nayîö
Fîxan û nale ez bêderdî nayî
Heqîqet şinew ez Pûr Ferîdûn
Ke şule ez tennûrê serdî nayî”
Kirdkî de şîîr hina ya:
“Delalê mi! Namêrdî
camêrdî nêkenê.
Ayê bêderdî ra hewar û
fîgan nêvejîyeno.
Ti Pûr Ferîdûn ra
raştîyan bişinawi
Tennûre serdin ra
kila adir nêvijîyena.”
Sey Baba Tahîre Uryan vano, neyare namêrdî camêrdî nêkenê. Neyare ma hina mamêrd o. Zulme hina keno, dinya de mîsale eyê çino. Vano, hezar serrîya ez ser şarê kurdî sermîyanî kena, gera tîya ra pê zî bikerî. R.T. Erdogan nê hêrîşanê xo yê ser Kurdistan’î ra şerm nêkeno û dewam keno, vano: “Ma şehîdan danê seba ke ma uca newe ra bikeri welate xo”.
Erdogan pê nê qiseyan xo hina peyam dano. Vano ke, “Ma Kurdistan newe ra dagirkenê. Çi destê ma de bîyero ma kenê. Ma qirkerdiş kenî. Ma Kurdistan vîran kenê”.
Wexto ke neyare Kurd û Kurdistan hina vajo û bikero, tebere xoverdayiş û têkoşînê de ti rayîrê bîn nêmanenê. Şarê Kurdî gera na raştî bivîno û gore na raştî hembere neyare xo serewedaro.