HAMZA GUNDUZ / MA / COLEMÊRG
Dewijê ke herêma Colemêrgî de cuyenî, hamnanî dest bi çînayîşê vaşî kenî. Kesê ke merkezê Wan û Colemêrgî de cuyenî, yenî dewa xo dest bi çînayîşê vaşî kenî û seba zimistanî amadekarîye kenî.
Emser vaş goreyê serranê bînan zaf tay o. Kesê ke heywanan miqate kenî, gerrekar î. Badê vaşî çend rojî tîje ver de manenî, dima ra yenî bestene û seba zimistanî pêser nîyenî. Kesê ke çînayîşê vaşî keno ra Suleyman Kanat vano ‘emser polîtîkayanê dewlete ver, ma zaf nêameyî dewe’ û wina domneno: “Ma serranê 90î de dewa xo ra ameye qerfnayene û ma mecbûr mendî ke merkezê bajarî de bicuyî. Ma seba çînayîşê vaşî ameyî dewa xo. Cayanê tewr weşan de qereqolî bica bîyî. Coka ma tersenî bêrî dewe. Çimkî nê qereqolî ra topî erzîyenî.”
Kanatî dewamê qiseykerdişê xo de wina vano: “Verê cû ma vaşê ke dormeyê dewe de vejîyayêne, arê dayêne. Hem werdêne û hem zî rotêne. Labelê nika qereqol destûr nêdano ke ma vaşî arê bidî. Wina kenî ke wa dewijî muhtacê dewlete bibî. Eke îmkan bibîyêne, ma do bikerdêne. Nika wina kenî ke ma dezgehanê dewlete ver de paweyê karî bibî.”