Rewşa OHALî de bi Qerarnameyê Hukmê Qanûnî (KHK) 97 hezar û 840 kedkar û xebatkarî gure ra ameyî îxraçkerdiş. Kedkarê ke Mudirîya Karê Awe û Daristanan ya Colemêrgî ra ameybî îxraçkerdiş Serkan Akbal, Hemserekê Komeleya MEYA-DERî ya ke Colemêrg de bi Qerarnameyê Hukmê Qanûnî ameybî qefelnayîş Selîm Kaya, hemwelatîyê Colemêrgî Omer Akbulut û Mahmut Temelî qala seba çi do referandûm de vajî ‘Nê’ kerdî. Akbalî qiseykerdişê xo de va ‘kedkarî zî hêrişan ra para xo girewtî’ û wina dewam kerd: “Ma vizêr se va û pawit ewro zî ma eynî çî vanî. Hêrişan de tena kesê ke sendîka, kedkar û demokrasî pawenî nînê hedefgirewtiş. Heme cayê Tirkîya de hêrişî estî. Tena rewşa welat û hêrişê ke herême de estî, seba vatişê ‘Nê’ besê ma yî. Keyeyê ma ameyî rijînayîş û ma mecbur mendî ke koç bikerî.”
Ciwanê ke ameyî qetilkerdiş
Kayayî qiseykerdişê xo de bale ant hêrişan ser û wina va: “Ciwan û xortê ke rasteyan de ameyî qetilkerdiş seba vatişê ‘Nê’ besê ma yî. Keye, dew û bajarê ma ameyî veşnayîş û rijnayîş. AKP hêrişê şaran keno. Ma do hêriş, qetilkerdiş û rijnayîşan ver vajî nê.”Temelî va ‘seba ke hêrişî ma ser de estî, ma cepheyê ‘Nê’yî de ca gênî’ û wina dewam kerd: “Ma her wext hetê mazluman de ca girewt. Ma do no proses de hetê partîya xo de bibî û çi destê ma ra bêro, ma do bikerî. Ma do dew bi dewe, keye bi keye bigêrî û qala ‘seba çi nê’ bikerî.”Akbulutî persa ‘seba çi nê’ kerd û wina va: “Dewê ma ameyî rijnayîş, keyeyê ma ameyî veşnayîş û îradeyê ma yê sîyasî ameyî tepiştiş. Na rewşe nîna qebulkerdiş. Cok ra ma referandûm de vanî ‘Nê’. Ma do bi komîsyonê xebatan bixebetyî.”
DÎHABER/COLEMÊRG