HAMDULLAH KESEN/ MA / HATAY
Wextê çalakîyanê Gezî de polîsan çalakîkeran ra Abdullah Comertî hedef girewtbi û doza Comertî çend rojî verê ameye dîyayene. Netîceyê doze de 6 serrî 10 aşmî û 15 rojî ceza dîyaye polîs Ahmet Kuşî.
Birayê Comertî Adnan Comert û avûkata Comertî Hatîce Cane vera qerarî de reaksîyon nîşan dayî. Avûkate Cane va ‘ganî polîsî madeya bi hawayo qestî kiştena merdimî ra ceza bigirewtêne’ û wina dewam kerde: “Labelê madeya taksîrî reyde kiştena merdimî ra ceza girewt. Ma do qerar rê îtîraz bikerî. Eke cezaya ke yena waştene nêdîyo, ma do doze bikirêşî MHME. Heto bîn de selahîyetdaranê ke emir dayo, nêameyî mehkemekerdene.”
Birayê Comertî Adnan Comertî zî va ‘ma seba edaletî 300 kîlometre rayîr ameyî’ û wina domna: “Ma paweyê edaletî bî. Labelê edalet çin o. Cezaya ke ameye dayene, wijdanê merdimîye de birînêk akerd. Serokkomar vano ‘ma huqûqêko bêhet û xoser awan kerd’, labelê wina nîyo. Hem birayê mi kişt û hem zî ma kerdî mexdûr. Edalet hetgir o û xoser nîyo.”