Vera tebîetê Kurdîstanî de polîtîkayê qirkerdişî domîyenî. Tarîx ra nata bi viraştişê HES, RES, ocaxê kerrayan, gêrayîşê altûnan, şewatê daristanan û sewbîna zirar dîyeno tebîetê Kurdîstanî. Cayê ke tede texrîbat esto ra yew zî Koyê Cûdî yo.
Qezaya Silopî ya Şirnexî de şîrketê bi nameyê Grûba Cînerî ke nizdîyê hukmatî ya, bi serran o bin nameyê ‘karê madenî’ de herêma Koyê Cûdî de texrîbatêko gird keno û zirar dano tebîetî. Seba santralê termîkî ke mabênê beldeyanê Gîte û Bêspînî de yo, her serre bi hezaran dolimî daristanî yenî veşnayene û wina bîyo ke girê tewr berzî yê Cûdî ra 2ê ci ver bi çinbîyayîşî de yî. Reyna her di giran de heta nika bi hezaran darî ameyî birnayene û warê bi hezaran gandaran ameyo çin kerdene.
Herême de warê madenî her ke şono hîra beno û bala merdimî anceno. Her roje bi seyan kamyon û kepçeyî war de xebetîyenî. War de tim dînamîtî yenî teqnayene û teqayîşan ver toz zaf o û hemwelatîyî tozî ra tesîr benî.
MA / ŞIRNEX