Nê heştay û di rojî yo ke DAIŞ hêrişê/gala Kobanê keno. Gelo DAIŞ Kamî rê xizmet keno? Gelo DAIŞ çirê endi hêrişê/gala Kobanê de israr keno?
Ay yewin; merkezê nê çeteyan de Merdimê Seddamî estî. Ma zanê ke merdimê Seddamê, heme kurdan qir bikî zî û gonîya înan fir bikî zî rehet nêbenî. La tena no sebeb zî zaf mantiqin nîyno. Yew ceng endi zî bi hovîtîy û bêmantiq nêbeno. Hewsarê nê çeteyan dest de mûqtedîran de yo.
Nê çeteyan se maşe şuxulnenî. DAIŞ beno, El Nûsra beno, ferq nêkeno, nê tewir rêxistinî, hetê tayê mûqtedîran ra ameyî organîzekerdiş.
Rojhilatê Mîyanên de, cehaletey zaf a. Zaf merdimî bi çend qalanê dînê îslamî, adeta hewa kuwenî. Yew dewijê ma yo safek bi. Nika şîyo rehmet, homa rehma xo ey biko. Yew roj ez, melayê dewe û çend dewijan ma teriqnaynî.
Ay wext zî Afganîstan de, Talîbanî (El Qaîdeyî) vera leşkeranê orisî ceng kerdnî. Nê safekê ma melayê dewa ma ra vat ke; “Emşo mi hewnê xo de pey kalme û tirs bi seyan, leşkerê Orisî (Rûsya) kiştî. Gelo mi raşta Afganîstan de leşkerê orisî (Rûsya) kiştî? Ez hewnîyaya ke o xo rê vano û xo rê goştareno. Melayê ma cewabê ey nêdaynî. Peynî de ez dekewta dewre û mi cewabê ey da. Mi vat ke; raşt a, ti şewe hewnê xo de, şonî leşkeranê orisî kişenî û roj zî yenî kar û debara xo kenî. Ti munewer yew merdim î. Ti hewnê xo de zî merdiman kişenî. Nê safekî, nê vatişê mi raşta înan kerdnî. Rayna wexto ke ez hima gede bî ya. Tayê xoceyanê ma vatnê.” Kê yew elewîyî bikişî, kê şonî cennet.
Mi zî xo bi xo vatnî; “Werekna mi yew elewîy bîdîynî û no elewî bikiştnî û ez xo rê bişîynî cennet:”
Semedo ke, çimê şaran nêabî û saltanat û îqtîdarê xo daîmî bikî (bikerî); serdestê Rojhilatê Mîyanênî, heme deman de, dîn û mezheban seba menfeet û îqtîdarê xo karanî.
Muslumanan, eke Rojhilatê Mîyanênî de, Peymana Medîneyî esas bigêrî; mîyanê şaran, dînan û mezheban de meseley nêmanenî. Hima-hima heme dewletê Rojhilatê Mîyanênî; hem nîjadperestey û dîn û mezhebê xo ra yew sentez virazenî û pey saltanatê xo pawenî. DAIŞî zî pey sunîtîy û erebtîya xo faşîzan yew polîtîka awan kerda. Merkezê nê rixistinê merdimî Sedamî estî.
No semed ra kurdan, mensûbanê sewbîna şaran, dînan, mezheban se dişmen veyneno û hêrişê kurdan û sewbîna şaran û dînan keno.
Çeteyanê DAIŞî, rayna 29ê teşrîne de, bi erebaya bomba barkerdaya zirxine, hêrişê Berê Murşîtpinarî kerdo. Yewna het ra eynî seatan de, Çeteyanê DAIŞî Embarê (Ofîsê) Mehsûlê Erdî yê Tirkîya û hîrê hetanê Kobanê ra bi çekanê giranan hêrişê Kobanê kerd.
Sîndorê Tirkîya mîyan de berê Murşîtpinar û derûdorê Embarê (Ofîsê) Mehsûlê Erdî de polîs û leşker bi panzeran, tanqan û çekanê giranan 24 seatan de newbedarey kenî. Çeteyê DAIŞî, çar seatan mîyan de bêvindertiş hêrişê Kobanê kenî. La nê seatan de, polîs û leşkerê Tirkîya, nê hêrişê DAIŞî temaşe kenî. Bellî yo ke no hêrîş, hêrişêko rêzin nîyo.
No hêriş bellî yo ke, Tirkîya de organîze bîyo. Eşkera yo ke, amancê nê hêrişê girewtişê Berê Murşîtpinar û teslîm girewtişê Kobanê yo. Bellî yo ke, no hêriş; yew demo derg de, hedre bîyo û dima zî pratîze bîyo.
Xora verê zî zaf rayan vejîya raşte ke, çeteyê DAIŞ û El Nûsrayî Tirkîya ra desteko lojîstîk û leşkerî gênî. Aseno ke hetan eyro nê çeteyî sîndorê Tirkîya ra serbest vêrtî û şîyî hêrişê Kobanê kerdo.
Tirkîya tede, Erebîstan, Katar, Amerîka û tayê dewletanê Ewropa bi destê xo DAIŞî ra yew cinawir peyda kerd. Nê dewletan yew demo derg de, hêrişê El Nûsray û DAIŞî temaşe kerdnî. Hetta waştnî ke Kobanê bikewo destê DAIŞî.
La YPG/YPJ bi keleşanê xo û bi rihêko fedayî vera nê çeteyan adeta yew destan nuşt. Peynî de nê çeteyê binê kontrolê efendîyanê xora vejîyayî. Eyro DAIŞ, nê dewletan zî tehdît keno û înan rê zî meydan wazeno. Hinê tena Xelîfe û efendîyanê xo rê xizmet keno.
Dewleta Amerîka Heme dewletê Ewropa, Erebîstan, Katar û heme dewletanê bînan DAIŞ û El Nûsrayî ra fek verradawo. Hetta goreyê xo, vera DAIŞî yew têkoşîn zî danî. Dewleta Amerîka, Îngîlîstan, Fransa, Erebîstan tede, vera DAIŞî yew koalîsyon awan kerdo û bi teyaranê cengî; Iraq de 230, Sûrîye de 76, yekun 300 operasyonê hewayî kerdî.
DAIŞ nîjadperesteya xo limneno, faşîzan yew polîtîka rameno. DAIŞ dînê îslamî xo rê keno alet û heme kesan ra bêşert û şûrt bîat wazeno. Hewce keno ke, heme muslûmanî, vera wahşet û hovîtîya DAIŞî vengê xo berz bikî. Şaranê Rojhilatê Mîyanênî ceng, pêrodayîş û xizaney ra zaf anta.
No tablo de ameyoxê şaran çin o. No tablo de heq edalet, azadî seyyebînaney çin a. Çare; demokrasî û aşîtî de yo. Dîn, mezheb, fikr, bîr û bawerî, cins, reng û etnîsîteyê înan çi beno wa bibo, heme kes; wa xo bi azad îfade biko (bikero). Rojhilatê Mîyanênî de, wa nemrûtê hemdemî dîn û mezhebî; seba menfeet û îqtîdar xo nêşuxulnî.
Verra şono dinya de, vera wahşetê DAIŞ û El Nûsrayî de, tepkîyî vêşî benî.
La Tirkîya hima zî fek DAIŞ û El Nûsrayî ra verranêdawo. Tirkîya ganî hinê vera DAIŞî, polîtîka xo zelal biko. Eke inahewa şêro Tirkîya zî sey DAIŞî, dinya ra îzole bena.



MAMOSTE SILEMAN/AMED