Hemleya xelesnayişê Vakûrê Reqa ke 24ê Gulane hetê QSD amê destcikerdiş roja 7. de ramena. Operasyono ke çeteyê DAIŞ derbeyê giranî wenê de quwetê QSD 10 kîlometre avey şî. Goreyê zonayişan çeteyê DAIŞ ke kewtî tengî serva pawitenê Reqa Mûsil ra desteg waştê. Vizêr zî Rojhelatê Çemê Firat û Vakûr Rojawayê Reqa ra hetê Tabqa baskê 4. ame destpa kerden. Fermandaranê QSD derheqê hemle de DÎHA rê qisey kerdî.
Fermandaranê Hemleya Xelesnayişê Reqa ra Rojda Felat aşkere kerd ke na hemle vera êrişanê çeteyan cewabê quwetanê demokratîk û şoreşgeran a. Felat da zonayen ke îye de her ca de pirodayişê çeteyanê DAIŞ biramê. Felat vist vîrî ke verîya herbê mîyanî yê Sûrîye cenî û camêrdan pêrokîn nûmayiş û aktivîteyan de pîya hereket kerdî û va, la destpa kerdişê herbê 2011î ra tepya qanûnê şerîatî kerdî serdest.
Reqa: Hec’a cîhadijan
Felat da zonayen ke bado ke 2014î de Reqa kewt bin îşgalê çeteyanê DAIŞ qeraqterê îslama radîkal girewt û qiseyê xo wina domna: “Sûk endî serva pêrokîn dinya bî zey tehdîdekê. Bî zey Hec’a pêrokîn cîhadijan. Çeteyanê DAIŞ bido ke herem pêrokîn girewt bin destê xo eve gurekaranê verên yê hikûmet û şarî ra sîstemekê goreyê xo rona. Çeteyan çarçoveyê na sîstem qanûn û mahkemeyê şerîatî ronay. Goreyê na sîstem walîyê xo tayîn kerdî.”
Ma dê hesabê zilmî pers bikerê
Fermandar Rojda Felat hayr ant muameleyê ke çeteyê DAIŞ cenîyan ra kenê ser û wina va: “Muameleyê ke qe jew îtiqat û kitabî de ca nêgêno cenîyan ser de ferz kenê. Cenî bê ke leyê ci de jew merdimê ci yo camêrd nêbo, nêşkenê şirê teber. Cenî gune çarşefa sîya xokerê. DAIŞ tûgayê ke cenîyan qontrol bikerê rona. Kuçeyan de ekîbê qontrolkerdişê çinayê (kinc) cenî û camêrdan dewrîye geyrenê. Yê ke goreyê ‘qanûnanê DAIŞ’ hereket nêkenê raştê cezayê qamçî yenê. Herzewbîn DAIŞ Tûgaya El Hansa yê cenîyan zî rona. Azayê na tûgayî cenîyê çeteyanê, kesê ke goreyê qanûnanê çina hereket nêkenê ceza kenê, tepişteyanê cenîyan rê îşkence kenê.”
Felat vist vîrî ke cenî rîwalo ke ebe çeteyan ra nîrê zewcnayiş nêvejyenê kuçeyan, keyeyê xo de manenê û wina va: “Cenîyê çeteyê ke yenê kişten, ebe jew azayê bîn yê DAIŞ ra yenê zewcnayiş. Cenî açarnîyayê koleyê sexî. Ma dê hesabê zilmê ser cenîyan pers bikerê.”
DAIŞ kotîde QSD ewja de
Felat aşkere kerd ke serva ke şaran bin zilmê DAIŞ ra bixelesnê îye de hemleyanê xo biramnê û vist vîrî ke cayê ke dişmenê însanîyetî çeteyî bibê, quwetê QSD dê şirê ewja.
Fermandarê Lîwa Ehrar Şerqî ke zereyê QSD de yo Ebû Evdilah zî vist vîrî ke serva serbestîya şaran înan na hemle dayê destpa kerdiş. Evdilah aşkere kerd ke tenya Reqa nê, kotî de çete estê îye dê şirê ewja û tekoşîna xo biramnê û va, heta çilka peynî yê gonîya xo dê xover bidê.
Reqa navendekê stratejîk o
Fermandarê bîn yê QSD Ebû Feyad ke ANF rê qisey kerd zî vist vîrî ke Reqa rayanê bazirganî yê sûkanê Sûrîye û yê Irak Mûsil û Bexda girêdana pê, ebe nay cayekê stratejîk o. Ebû Feyad da zonayen ke operasyonê xelesnayişê Vakûrê Reqa ke hetê Eyn Îsa ra 3 hetan ra destpa kerd ser waştena şaranê herem virazîyeno û derheqê avey şîyayişê operasyonî de nê zonayişan day: “Çarçoveyê operasyonî de heta nika dew û sûkekê zey Qirtaca, Fatsa, Hedrîyat Xelîl, Nemrûdîyê, Hîşê, Indîbên, Mîtemesrîc çeteyan ra amey xelesnayen. Dewê ke amey xelesnayen de xêlê azayê DAIŞ zî amey kişten, bi desanê ci zî bî dirbetin. Çeteyê DAIŞ derbeyê girdî wenê û kewnê panîkî, hewl danê bi çinayanê QSD biremê.”
Çapemenîya Tirk û Ereb zûrî kenê
Fermandar Ebû Feyad xeberanê asparagas û nîdajî yê çapemenîya Tirk û Ereb rê zî nêrazîbiyen damusna û va: “Quwetê QSD heta nika çarçoveyê nîjadperwerî de nezdîyê şaran û mintiqe nêbî.
Ebû Feyadî xebera ‘Quwetanê QSD roja sifte 300 vindî day’ yê çapemenîya tirk zûrî vet û xeberê çapemenîya Ereb zî zey asparagas biname kerd. Ebû Feyad aşkere kerd ke quwetê QSD temsîlkarê şaranê Sûrîyeyê û vist vîrî ke hedefê QSD de pawitişê menfeatê şaranê herem estê. Ebû Feyad peynîyê qiseyanê xo de ard ziwan ke zey QSD îye dê her ca de çeteyanê DAIŞ ro dê û Sûrîyeya Demokratîk înşa bikerê.
DÎHA-ANF/GIRÊ SPÎ/EYN ÎSA