Netîceyê operasyonê xelesnayîşê Tebqa yê Xezeba Firatî yê QSD de fermandar û endamê DAÎŞ Tebqa ra ver bi sûka Dêra Zor remenê. Goreyê îdîayan DAIŞ hinî do Dêra Zor bikero merkez.
Şervanê Quwetê Sûrîyeya Demokratîk (QSD) yê ke mîyanê Operasyonê Xezeba Firatî de ca gênê, Tebqa de derbeyê girdî day DAIŞî ro û quwetê ci kişitî. Nayî ra Emîrê DAÎŞ mecbûr manenê ke sûka Reqa ke zey paytext weçînayê veng bikerê û verê xo bidê Dêra Zor. Moral û motîvasyonê endamanê DAIŞ yê Reqa kişîyayo. Çarçoveyê Operasyonê Xezeba Firatî de heta nika 150 emîrê DAIŞ Reqa ra remayê Dêra Zor. Endamê DAIŞ hewl danê ke peytexta xo ya lejkerî Dêra Zor îlan bikerê.
Welatijan rê îşkence
Goreyê zonayîşan sûkeka El Meyadîn de DAIŞ dest roneno ser keye û waranê ronişteyan. Seba ke DAIŞ ters û xov ser welatijan de bikero, kerdenanê cîya cîya ferzê ci keno. Nê kerdenan ra yewe zî taxa Tekaîya yê sûkeka El Meyadîn de qewimya. DAIŞî bi behaneyê cixare şimito cezayê 30 qirbaç dayo welatijekê taxê. DAIŞ, seba ke serdestîya xo ser Dêra Zorî de bikero, bi moşekan hêrîşê noqteyanê rejîmî keno.
‘El Bexdadî Musil ra remayo’
Goreyê tayî îdîayan zî, Emîrê DAIŞ Ebû Bekir El Bexdadî Musil ra remayo herêma sînorê Suriyê. Goreyê tayî vatenan Bexdadî Dêra Zor de bi ca bîyo û do hinî Dêra Zor zey paytexta xo îlan bikero.
Heto bîn ra ame vaten ke Amerîka bi Urdunî ra, Derîyê Tenev ê başurê Surîyê de kombîyayîşeke viraşto û seba ke ser DAIŞî hêrîşanê xo vêşêr bikero, hempeymanek virazîyayo.
311 çete kişîya
4. Hemleya Xezeba Firatî, ke seba xelesnayîşê Gelîyê Celab ê bakurê Reqa destpa kerd, ramena. Goreyê zonayîşê ke Odeya Xezaba Firatî day, xêlê dew û sûkekî amey xelesnayen, 311 çete kişîyay. Hemle de 30 şervanan zî weşîya xo kerd vinî.20 hezar sivîlî amey xelesnayen.
ERDOGAN ALTAN / DÎHABER / REQA