DAIŞ û tıfaqa kurdan

DAIŞî tewr verî Sûrîye de Rakka girewte. Dima çar saetan mîyan de Mûsil girewt. Dima bi şeklo hovane hêrişê Şengalî kerd. Dima zî hêrişê Mexmûr, Rabîa û Deyr Ez Zorî kerd. DAIŞ billakerdişê gonî ra mird nêbîynî, adeta har bibi. Peynî de bi tanqan, topan, fuzeyan, obusan û tewir bi tewir çekanê modernan û giranan hêrişê Kobanê kerd. Ganî yewrê no DAIŞo har û gonîwer biedilnaynî. DAIŞî yew xeletîyêka tarîxî kerde ke, hêrişê kurdan kerd. Peynî de sereyê DAIŞî Kobanê de teht ro ginayo. Na heme kes zano ke, DAIŞ dişmenê kurdan o. Çi wext ke firset veyno, hêrişê kurdan keno. Seba ke heme kurdan qetil biko, fetwayan vejeno. DAIŞî kuta-kut 134 rojî peyder-pey hêzê xo kom kerdnî, hêrişê Kobanê kerdnî. La peynî de bi qehremanîya YPG/YPJ, pêşmergeyan, HPG û Volkanê Firatî, DAIŞî Kobanê de yew derbeyo pîl werd û Kobanê azad bi. YPG/YPJ Kobanê de bi ceng û cesaretê xo dinya de yew vengan da. Kobanê de yew tarîx nuşt. YPG/YPJ bi no ceng û cesarete xo yew rêzbîyayîş heq kerdo. Kurdan bi sayeyê ciwananê xo yê qehremanan denklemê Rojhilatê Mîyanên de, hem qederê xo û hem zî qderê şaranê Rojhilatê Mîyanênî tayîn kenê. Çareka seserra vîst û yewine de, wina (ina) hewa yew têkoşîna hima nêdîyaya. Semedo ke Kobanê azad bîyo; welat de û tebere welatî de tewir bi tewir şahîyî organize bîyî.

Raşta ey (jey) şarê dinya zî nê şahîyan û merasimanê azadîya Kobanê de cayê xo girewtbi. Dinya de, Yewê Teşrîne (Mijdare) 2014 Rojê ê Kobanê de çar hetê Dinya de, vera DAIŞî destekdayîşê YPG/YPJ; Awûstralya ra hetan Spanya, Afganîstan ra hetan Îskoçya, Fransa ra hetan Amerîka, merdimê dekewtê kuçan û meydanan. Cengê (Şerê) Kobanê ra pey, hem hetê sîyasetê ra, hem zî hetê leşkeri ra dinya, di bare (pare) bîya. Yew het ra Dewleta Tirkîya û tayê rêxistinê tarîyê ke destek danê DAIŞî, yewna het ra kurdî û mutefîqê kurdanî ke vera DAIŞî têkoşîn danê safê xo bellî kerdî. Azadîya Kobanê dima Rojhilat Mîyanên de hemsengê (dengeye) sîyasetê bedilîyayo. Hêrişê û wahşetê DAIŞî dima, seba pawitişê Kobanê YPG û YPJ bi cesaret, bi qehremenî û fedayîya xo, adeta ezberê hezar serran herimnayo. YPG/YPJ hîrêgoşeya şeytanî de, sêhîrê statoqûyê, nemrûtanê hemdeman, faşîstan û sûltanan qralan, derkenar kerd. Rojhilatê mîyanên de, sîyaset, bîr û bawerî û tifaqê mîyannetewîyî newe ra dîzayn benî.

Nê qralan, nemrûtan, faşîstan û sûltanan û qralan; dînê îslamî û mezhebê dînê îslamî goreyê menfeetê xo krîtîk (şîrove) kerdo. Seba text û menfeetê xo, dînê îslamî tehrîf kerdo. Mesela esas de, dînê îslamî de, ferasetê heremê carîyeyan û koleyan çin o. Mesela goreyo ke alimê îslamî vanê; “Hetan yewer hêrişê welatê kê nêko, kê ganî hêrişê înan û welatê înan nêkî. Dînê îslamî de, seba etnîsîteyî, seba bîr û bawerû dîn û mezhebî qetlkerdişê merdiman guneyo. Esas de, qetilkerdişê yew merdimî, qetlkerdişê heme merdiman hesibêno.” Yew het ra bi ruhê enternasyunalîzmî, Suphî Necat, Kader Ortakaya tede, bi desan ciwananê sewbîna şaran, Kobanê de cuyê (heyatê) xo vînî kerdo. Şaranê dinya ra epey ciwanî, hima zî ha Kobanê de ceng (şer) kenê. Wexto ke kê no cephe ra biewnî, Kobanê bîyo; Stalîngrado dîyîn, bîyo cepheyê têkoşîna yê enternasyonalîzmî. Yewna het ra, Pêşmergeyan, bi tam techîzat û çekanê xo yê giranan beştarê têkoşîna pawitişê Kobanê bîyî. Seba tifaqa kurdan; na game, gamêka tarîxî ya. Bûrkan El Firatêko hewt rêxistinan ra yeno meydan, YPG û YPJ reyde pîya vera DAIŞî ceng (şer) kerd.

Mîyanê Volkanê Firatî de; erebî, kurdî, çerkezî, tirkmenî, ermenî û musewîyî estî. Nê grûban mîyan de mensûbê sunîyani nûsayrîyan, xiristîyanan, yahûdîyan, durzîyan, îsmaîlîyan estî. Kobanê de, gonîya ciwananê nê şaran û mensûbanê nê dînan û mezheban têmîyan bîya. Aseno ke Kobanê de, zaf renginîya şaran, dînan û mezheban esta. Û kurdî wazenê ke, na cografya de, yew zemîno demokratîk de, heme şaran û mensûbanê heme dînan û mezheban, bîr bawerîyan reyde yew tifaqe virazî û sey birayan têreyde biciwîyî. Xora Kobanê de, mîyanê şaran de yew tifaqayêka tebîî (xozayî) virazîyaya. Bê Dewleta Tirkîya û tayê rêzistinanê tarîyan, heme dinya fam kerd ke, eke DAIŞ kurdan qir biko, sira yena şaranê bînan. No semed ra, dewleta Amerîka û dewletê Awropa tede 51 yew dewletan yew koalîsyon awan kerd û bi teyeranê xo yê cengan, hewa ra ardim dayê kurdan. Penîya 134 rojan de bi têkoşîna ciwananê kurdan û şaranê bînan Kobanê Azad bi. Nika zî hima-hima heme dewê kobanê azad benî. Kobanê azad bibo zî çeteyê DAIŞî, her firset de, Rojawan û Başûr de hêrişê kurdan kenê. Aseno ke nê çeteyê DAIŞî, hovîtîya xo de israr kenê. Raşta ey (jey) eke Kobanê bikewtînî, Kantonê Efrîn û Cizîre zî kewtînî. Eke Kobanê bikewtînî, Kerkuk, Hewlêr, Silêmanî zî kewtnî. Raşta ey hima zî taloke nêvêrto, hima zî ceng dewam keno.

Mîyanê kurdan de, hetê leşkerî ra, pratîk de yewîyey virazîyaya. Semedo ke hetê leşkerî ra resmîyet de zî yew tifaqa kurdan bibo resmîyet de mûtlaq hinê yew tifaqa leşkerî bibo. Cor ra ma behsê tabloyê Kobanê Rojhilatê Mîyanênî û Dinya kerdo. Nê şertan de, hinê hem hetê leşkerî ra, hem zî hetê sîyasetî ra, yew tifaqa kurdan şert a. No seba kurdan û hema şaranê rojhilatê mîyanî yew gama tarîxî ya. Kurdî yew demo talokeyin ra vêrenê. Semedo ke talokeyê DAIŞî berteraf bikê, na tifaqa kurdan ya leşkerî û sîyasî şert a. Heme kes wazêno ke, mîyanê kurdan de yew “Kongereyê Netewîyî” organîze bibo. mîyanê kurdan de, hem rojawan de, hem zî başûr de fîîlîyat de yew tifaqa hêzê leşkerî virazîyaya. Bê kurdan; ne sûrîye de, ne Iraq de, ne zî Rojhilatê Mîyanên de meseley çareser benî. Hetê leşkeri ra resmî nêbo zî kurdan mîyan de yew tifaqe virazîyaya. La hetê sîyasetî ra hima zî fermîyet de yew tifaqe, nêvirazîyaya. Kurdî, ganî hine nê hêrişê DAIŞî ra ders bigirî. Eke kurdî heme hewa ra mîyanê xo de tifaqa xo nêvirazî yan DAIŞî rê, yan sewbîna rêxistinanê tarîyan û dewletanê faşîstan rê êm (yem) benê.