Vera darbeya AKP ya dûştê HDP teberê welatî ra zî nêrazîbiyenî benê berz. Badê wedarnayişê heqê destnêdayişî kurdan ra pîya çormeyê sosyalîst û demokratî vejîyayî meydanan û sloganê zey ‘Darbeya Seray rê nê’, ‘Destê xo HDP ra biance’, ‘Kiştox Erdogan’ berz kerdî. Sûka Almanya Frankfûrt de bi seyan Kurdistanijî ver îstasyonê tren yê sûk de are bî. Nûmayişkarî bi sloganan heta Meydanê Opera ya verên ray şî. Nûmayişo ke açarnîya mitîngî de ser nameyê NAV-DEM Vîldan Dîrîk qisey kerd.
Serva HDP benime seferber
Dîrîk aşkere kerd ke kurdî senî ke wayîrê Kobanê, Şengal, Cizîr û Roboskî vejîyayî, dê ewro zî wayîrê HDP zî bivejîyê. Dîrîk vist vîrî ke dûştê HDP ke bi mîlyonan kesan rey da ci darbe virazîya û wina va: “Endî AKP, CHP, MHP kewtî pelanê sîya yê tarîxî. Ma zey kurdê ke Awrûpa de cuwyenê, nayîra tepîya ma dê tekoşînê HDP bigîrê ser xo û serva ke Awrûpayijan rê vajê ma dê seferber bibê.” Mitîngê Frankfûrt badê wendişê vilavokê Almankî yê NAV-DEM qedîya. Eyaleta Almanya Nord-Rheîn Westfalya de zî gencanê kurd nûmayişê protestoyî viraştî. Bi seyan gencê ke sûka eyaleta NRW Koln de amey pêhet slogananê zey ‘Kiştoxê domanan Erdogan’, ‘Bicuwe HDP’ berz kerdî. Gencê ke Ebertplatz de are bî, bi sloganan heta Dêr’ê tarîxî Dom ray şî. Gencan vilavokê bi Almankî kerdî vila û waştî ke ‘Tirkîye boykot bikerê û nêşirê tehtîlî’. Nûmayişo ke xêlê rêxistinan paşt day de panqarta bi resîmê Kemal Pîr û Hakî Karer’î hewadîya.Gencê bi nameyê Amed Argeş û Canê Batman ke tewrê nûmayiş bî veng day gencan ke her ca de bivejîyê meydanan. Gencan vera faşîzmî mesaja xoverdayiş day.
‘Dest mede îradeyê mi’
Sûka bîn yê Almanya Kassel de zî serva protestokerdişê Darbeya Seray nûmayişê ‘Dest mede îradeyê mi’ virazîya. Jû komekê Kurdistanijî ke Meydanê Stern trafikî rê girewtî hayr antî qetlîamanê AKP ser. Nûmayişkaran bi sloganan AKP protesto kerdî.
Rîwalê protestokerdişê wedarnayişê heqê destnêdayişê parlamenteranê HDP, Terolar de ronayişê kampê DAIŞ sûka Almanya Freîbûrg de hetê Navendê Civaka Demokratîk yê Freîbûrg, Dergaha Kultur yê Alewîyan û Komunê Cenîyan yê Nûda nûmayişê protestoyî virazîya. Rêxistinanê Çep yê Almanan ra pîya eve seyan kesî tewr bî. Şêligo ke Kartoffelplatz de are bî bi slogananê ‘Bicuwe HDP’, ‘Terorîst Erdogan’ heta Agustînerplatz rayşî. Îta de vilavokê NAV-DEM ame wenden û hayr ancîya êrişanê AKP yê vera şarê Kurd ser.
Japonya ra paştdayen
Dûştê Darbeya Seray Japonya ra zî nêrazîbiyen ame. Kurdistanijê ke Tokyo de ver Sefaretxaneyê Tirkîye de damûstayîn ame dayen. Damûstayîna ke ebe kurdî û japonî amê dayen de vajîya ke ma dê dûştê Darbeya Seray virazîya de leyê îradeyê xo de ca bigîrê. Weçîntayinanê 1ê Mijdarî de HDP zey partîya jûyîn vejîya.
NAVENDÊ XEBERAN