Dayê Kinê, yanê ziwanê kirmanckî de dayika kilme. Şima nameyê aye de nîyamedê. Nameyê xo Kina la a bi xo kilme nîya. Kanê zaf derge kî nîya la kilme kî nîya. Kanê kilama ay lê kinê esta ya ti vana qey ser Dayê Kinê vajîyaya. Ay lê Kinê lê lê mala min ê way way/ Ez ne kinim lê lê ne dirêj im lê./ orta boylu xweş dengbêjim way way. Ez nêzanena dayê kinê kilaman vana ya nêy la Dayê Kinê cinîyade zaf hewl a. Bê ters a. Hemverê kesî de sereyê xo nêtewenena. Tim û tim sere berz a.
Dayê Kinê da-pancas serî esta. Rewra wo zewecîya la domanê xo nêbîyê. Kes nêzaneno qey domanê xo nêbîyê. Ne dayê Kinê ne kî hevalê Dayê Kinê na xo rê nêkerda mesele. Înan kênakade mordemanê xo girewta sey kêna xo kerda pîl. Dayê Kinê heskerdîş a. Serî heta lingan heskerdîş a. Dayê Kine virana germ a. Virana germ a bê ma û bê pîyan rê. Şewkat a Dayê Kinê. Hemverê heval û hogiran de çiqas bi şewkat a, hemverê dişmenanê mordemiye de hende bihêrs a. Dostî de dost dişmenî de dişmen a. Hurdmînan de kî merd a.
Resenîya Êzidîyan varena Dayê Kinê ra. Mordem Dayê Kinê de verê xo dano tarîxê Êzidîyan. A bi mordemî dana hîskerdîş ke Êzidîyatî esasê xo de çîya. Dayê Kinê qet nêwendo. Aye qet rûyê mektebî nêdîyo. Qet berê mektebêk ra nêkewta zere. La zanayîşê Dayê Kinê zanayîş o. Dayê Kinê zanistê komelî û xozaye wendo.
Dayê Kinê merg kîşto. Mergo ke hîrêyê aşma heştan de Şengalijan ser de ameybî, Dayê Kinê o merg kîşto. Tersê ey kerdo binê linganê xo, payna ci dayo û dayo raye ro. Dayo raya heqî ro. Dayo raya tîja homete ro. Dayo raya Tawisê Melekî ro. Na raye de bê ters û bê xof raye ra şona.
Dayê kinê bêhêvîtîya qefçile de hêvîye kena vila. Dayê Kinê şerker a bê qîretî ya. Bêqîretîya bêxud a ke terteleyî ardê sereyê Êzidîyan ser o. Venga cinî û camerdan dana bi ciwanikîya xo ya xurt e. Bi zerrîya xo ya hewle. Vana; ha qîret cinî camêrd ha qîret. Bê qîretî ma rê nêbena.
Dayê Kinê wela mergî ya ke erzîya Êzidîyan ser o bi lapan yadana. Bi nenigan kinena. Nenigê Dayê Kinê mîyanê gonî û goneşîre de manenê. Tîmsahî gonî û gonîşîra neniganê Dayê Kinê kenê babeta facebook an. Xema Dayê Kinê de nîyo. Tew înan nas nêkena. Aye raya xo girewta raye ra şona.