Çend rojîyo ke Şengal de va û vartîş o. Va û vartîşî ra û dirbî bi ma birnayê. Ma mahkumê zereyî kerdîme. Senî ke embazêk telefonî de va bêrê kombîyayîş o keyfê ma rê vatîş nêmend. Min û Xoxe xo amade kerd û ver bi cayê meclîsa cinîyan kewtîme raye. Oxx rayeraşîyayîş çiqas weş o! Xoxe gereyê çamure kena la keyfê mi keyf o. 

Kombîyayîşê meclîsa TAJÊ(Tewgera Azadîya Jinên Êzidî-Tewgera Azadîya Cinîyanê Êzidî) bî. Kombîyayîş zaf bi weşa mi şî. Kombîyayîş ra zîyaderî manenê vanê ya şewbûhirk no rojbûhirk bî. Ti vana qey komêda cinîyan amayê têlewe xo rê sohbet kenê. Tabî babeta sohbetê înan meseleyê sîyasîyê. Meseleyê welatî yê. Meseleyê Şengal û Êzidîya yê. 

Dîwan ame weçînayene.Pelşîn û Dayê Gulê. Dayê Gulê tewr pîla meclîsî ya. Emrê xo nêzdîyê şêştay esto. Bejnade derge ser a. Oxro ke emir girs a la sey kênayade azebe tîk a. Fistanê birîsim o sipî ser de xirqeyade şalenê daya bi xo ra. Çîta sipîyê kî tam fistanê aye kena temam. Çîta xo kurdînî naya sereyê xo. Bin de poro sîyayo ke têlê xo yê sipî zêdê yê aseyeno. Pîze û çiçikan ra kifşo ke zaf domanî ardê. 

Rewşa sîyasî Pelşîne raye ra berde. Eke dore ameyê rewşa rêxistinî Pelşîne kîşta xo de çerexîye dayê Gulê bi vengêde nîştkek ci ra va:

-Dayê Gulê dora to ya. Na rey kî ti kombîyayîşî raye ra bere. 

Dayê Gulê tayê mahcup:

-Wî kêna mi ez nêzanena. Ez nêzanena sey şima qisey bikerî. Ez zanena çi ame bi ma ser, kam dişmenê ma yo kam dostê ma yo, kam ma rê se kenê ez nînan zanena la ez sey şima nêzanena qisey bikerî. 

Ma pêro fek yakerde Pelşîn û Dayê Gulê goşdar kenîme.Pelşîne fek ci ra nêverda ra. Hurdmîna linge êşta yewbînî ver ma kî xo rê înan de nîyadame. Dayê Gulê vate guret, çîyê ke zanena defêna vatî. Û ser de zêde kerd:

-Eke ma kî sey şarê vakurî xo ver ro bidayênê ewro tertele nêameyênê serê ma. Sey a cinîya ke destê aye qeyd kerdbî, kelebçeyî rêştênê asteyanê aye oxrê ey kî aye destê xo kerdênê berz û qisey kerdênê. Sereyê xo tîk bî. Aya bîne mi dîye çermê sereyê aye ci ra kerdbî heta verê çimanê aye. Hurdmîn destê aye ver ra girêdaybî. A nêvinetenê qisey kerdenê. Eke ma kî bişîkîyêne sey înan xo ver ro bidayênê ewro halê ma zaf cîya bîyênê. 

Odayê de bêvengiyade henêne kewtê kar ke to derzîyê biêştenê hard vengê aye bîyamêne heşnayene. Dayê Gulê tenê qisey nêkerdenê a cayê xo de sey yew kaykerdoxa tîyatroyî tewgerîyayenê. Bê vengiya ma demêk ant pey ra ma ameyme bi xo û kombîyayîşê xo donma. Dayê Gulê xeylê çîyî musanayî ma…